«A» korpýsyna ótken azamattardyń 50 paıyzy jumyssyz júr - Q. Qojamjarov
ASTANA. QazAqparat -«A» korpýsyna ótken azamattardyń 50 paıyzyna jýyǵy jumyssyz júr. Búgin Parlament Májilisiniń jalpy otyrysynda QR Memlekettik ister jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov osylaı málim etti.
Agenttik basshysynyń aıtýynsha, «A» korpýsyna ótken azamattardy jumysqa ornalasýdyń merzimi men shektelgen ýaqyty da barshylyq. Al osy ýaqyt ishinde kandıdattarǵa jumys berilmese, olardyń konkýrstan ótý nátıjeleri óz kúshin joıady.
«Ekinshiden, «A» korpýsyna kim ótip otyr degen másele ózekti. Olardyń bilimi men teorııasy jaǵyna ǵana emes, jeke basynyń qasıetterine, ómirlik tájirıbesine basymdyq berilýi kerek. Olar aýdandyq, oblystyq jáne respýblıkalyq deńgeıdegi tájirıbelik satylardan ótýleri tıis. Máselen, aýdan halqy óz ákiminiń bilikti qyzmetker ekenin, onyń iskerligin biledi. Alaıda, sondaı azamattar teorııalyq jaǵynan aqsap, konkýrstan ótpeı qaldy», - deıdi Qaırat Qojamjarov.
Bul rette agenttik tóraǵasy «A» korpýsy boıynsha zańdardan emtıhan tapsyrý máselesine de toqtalyp ótti. Onyń aıtýynsha, test ótkizýde shekteýler bolmaýy kerek. «Máselen, sybaılas jemqorlyqqa qarsy zańnyń 70 paıyzdyq mejesine jete almaǵandar synaqtan ótpeı jatyr. Bul kerek pe, ózi? Biz buny alyp tastaýymyz kerek, óıtkeni osynyń ózi Agenttiktiń ishinde sybaılas jemqorlyq qylmystyń kórinisterin týdyryp otyr. Jasyratyn eshteńe joq, qazir «A» korpýsynyń testinen ótý úshin tanys izdeýshiler de shyǵyp otyr. Bul sybaılastyq, men ony baıqap otyrmyn», - dedi ol.
«Meniń osy qyzmetke kelgenimen kóp bolǵan joq. Degenmen, tereń saraptama jasadym. Meniń oıymsha, «A» korpýsyna túsetin azamattar satyly túrde kóterilýi kerek: aýdan, oblys jáne respýblıka deńgeıinen ótip qana «A» korpýsyna túsýge umtylýy kerek. Buǵan halyq ta qatysýy kerek. Máselen, «A» korpýsyna óterde kandıdat týraly jurtshylyqtyń, onyń áriptesteriniń oń pikiri de qajet», - dedi Qaırat Qojamjarov.
Sonymen qatar, Agenttik tóraǵasy «A» korpýsyna qatysty irikteý júıesine kóńili tolmaı otyrǵanyn jetkizdi. «Meniń Elbasyna daıyndap otyrǵan usynysym bar. Testileýdiń joǵary shegin alyp tastaý kerek dep oılaımyn. Eń bastysy, adamnyń bilim deńgeıi ǵana emes, olardyń halyqpen jumys isteýi, jurtshylyq pen qyzmetkerlerdiń baǵasy úmitker úshin mańyzdy bolýy kerek. Osyndaı baǵalaýlardy qosa otyryp qana kandıdattardy Ulttyq komıssııaǵa shyǵarýǵa tıispiz», - dedi Q. Qojamjarov.
