«A» korpýsyna irikteýden 17 jaýapty hatshynyń bireýi óte almady

Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Memlekettik qyzmet isteri agenttiginiń tóraǵasy Álıhan Báımenov málim etti.

«Qazirgi ýaqytta «A» korpýsynyń laýazymdarynda jumys atqaratyn memlekettik qyzmetshilerdiń keıbir testileý nátıjelerine toqtalatyn bolsaq, laýazymdary «A» korpýsyna ótetin memlekettik qyzmetshiler qatarynan 511 adam osy korpýsqa irikteýge qatysý úshin qujattaryn tapsyrdy. Olardyń ishinen 155 kandıdat, ıaǵnı 30 paıyzy shekti mánnen óte almady», -dedi Á. Báımenov.

Sonyń ishinde 17 jaýapty hatshynyń bireýi, oblys ákimderi apparattary basshylarynyń ekeýi, 41 komıtet tóraǵalarynyń segizi, 75 tekserý komıssııalarynyń tóraǵalary men múshelerinen 20-sy, 191 qala, aýdan ákimderiniń 54-i, Memlekettik qyzmet isteri agenttiginiń 16 tártiptik keńesteri tóraǵalarynyń 2-eýi, sondaı-aq basqa da memlekettik qyzmetshiler synnyń birinshi kezeńin eńsere almady.

Endi bul azamattar irikteýdiń kelesi kezeńine jiberilmeıdi.