«A» korpýsy saıası qyzmetshiler sanyn 6 esege qysqartýǵa múmkindik berdi - Jaıylǵanova
Elbasy – Tuńǵysh Prezıdent N.Á. Nazarbaevtyń «Strategııa-2050: qalyptasqan memlekettiń baǵyty» atty Qazaqstan halqyna Joldaýyna sáıkes, 2013 jyly elimizde memlekettik saıasattyń naqty baǵyttaryn iske asyrýǵa jaýapty kásibı basqarýshylardyń jańa toby – «A» korpýsy jasaqtalǵan edi.
«Bul saıası qyzmetshilerdiń sanyn 6 esege – 3,2 myńnan 538 adamǵa deıin qysqartýǵa jáne memlekettik qyzmettiń qazirgi úsh satyly modelin qalyptastyrýǵa múmkindik berdi. Eger saıası korpýs tıisti bir baǵyt pen salany damytýdyń strategııalyq baǵyttaryn aıqyndasa, «A» korpýsy strategııalyq sheshimder qabyldaý men olardyń oryndalýy arasyndaǵy sabaqtastyqty qamtamasyz etedi. Búgingi tańda «A» korpýsynyń shtattyq sany 84 adamdy quraıdy. Memleket basshysy Q.K. Toqaev «Bolashaq kóshbasshy memleketterdiń básekege qabilettiligi daǵdarystar men irgeli ózgerister dáýirinde týyndap jatqanyna» nazar aýdardy. Sondyqtan QR Memlekettik qyzmet isteri agenttigi basshylardyń jańa býynyn qalyptastyrýǵa, atap aıtqanda, olardyń quzyretteri men kásibıligin damytýǵa kóp kóńil bóledi», - dedi MQІA tóraǵasy Anar Jaıylǵanova.
Atalǵan kýrs úshinshi ret uıymdastyrylyp otyr jáne «A» korpýsynyń oqýyn túıindeıdi. Bul kýrstarda Konstıtýtsııalyq Keńestiń, Joǵary Sottyń, Reformalardy strategııalyq josparlaý jónindegi agenttiginiń, Esep komıtetitiń jáne t.b. apparat basshylary men komıtet tóraǵalary, jalpy sany 25 adam oqyp jatyr. Oqytý barysynda jobalyq menedjment, jumys protsesinde týyndaıtyn teketirester, qarjy jáne fıskaldyq menedjment, bıznes-úderister reınjınırıngi, memlekettik qyzmet kórsetý tásilderiniń transformatsııasy máseleleri qarastyrylǵan.
Sonymen birge, MQІA tóraǵasy Anar Jaıylǵanova atalǵan kýrstar arqyly jańa formatsııa basshylary strategııalyq kóshbasshylyq, ózgeristerdi basqarý jáne tıimdi kommýnıkatsııalar sııaqty qasıetterdi boıyna sińirip, óz quzyretterin damytýǵa múmkindik alatynyna senim bildirdi.
Arnaıy kýrstar 21 qarashaǵa deıin jalǵasady.
