A.Kontador alǵa qoıylǵan maqsatty oryndap, úmitti aqtady - Qaırat Kelimbetov
ALMATY. Tamyzdyń 7-si. QazAqparat /Ádilet Musahaev/ - «Astana» velokomandasy tek sport jobasy ǵana emes, Qazaqstandy dúnıe júzine tanytatyn brendke aınalyp otyr.
Bul jaıynda búgin «Samuryq-Qazyna» ulttyq ál-aýqat qorynyń basqarma tóraǵasy Qaırat Kelimbetov arnaıy baspasóz máslıhatynda aıtty.
Q. Kelimbetov elimizdiń brendine aınalǵan «Astana» komandasyn qurý týraly ıdeıa Elbasy tarapynan bolǵandyǵyn jáne Memleket basshysynyń tapsyrmasymen iri halyqaralyq jarystarǵa qatysatyn komandanyń qurylǵandyǵyn aıtyp ótti.
«2008-2009 jyldary komanda qarjy qıyndyqtaryna tap boldy. Sol ýaqyttan beri «Samuryq-Qazyna» ulttyq ál-aýqat qory «Astana» komandasynyń basty demeýshisine aınaldy», deıdi Q.Kelimbetov.
Sondaı-aq ol jaqynda ótken «Týr de Frants» velojarysyndaǵy Alberto Kontadordyń jetken jetistigi tek onyń ǵana emes, búkil komandanyń jeńisi ekendigin aıtty. «Astana» sport jobasy ǵana emes, shetelge Qazaqstandyq sportty tanytý men elimizdiń ımıdjin kóterýdegi úlken joba bolyp otyr. Ózderińizge belgili, «Týr de Frants» jarysy 300 mıllıonǵa jýyq telekórermendi qamtıdy», dedi ol.
Sonymen qatar Q.Kelimbetov Alberto Kontadordyń belgilengen merzimi aıaqtalǵan soń basqa komandaǵa aýysatynyn jáne bul qalypty qubylys ekendigin jetkizdi. «A. Kontador óte talantty sportshy, onyń aldyna qoıylǵan negizgi maqsat Týr de Frantsty jeńip shyǵý bolatyn. Ol bizdiń úmitti aqtady», dedi atalmysh qordyń basqarma tóraǵasy.
Q.Kelimbetov otandyq velomektepter óte myqty ekendigin jáne Aleksandr Vınokýrov sııaqty jaqsy sportshylar óz mektebimizde ósip kele jatqandyǵyn jetkizdi. «Astana» komandasynyń quramyndaǵy 13 sportshy óz mektebimizden tálim alǵandar. Qazirgi basty maqsat - velomektepterdi odan ári damytyp, komandaǵa ózimizdiń jas sportshylardy daıyndaý. Taıaý 5 jyldyń ishinde «Týr de Frans» jáne basqa da úlken jarystarǵa elimizdiń jas sportshylaryn qatystyrý», dep atap ótti ol.
Sóz sońynda Q. Kelimbetov, «Astana» velokomandasynyń aldaǵy ýaqytta qandaı jarystarǵa qatysatyndyǵy komanda quramynyń qaıta qurylýynan keıin ǵana belgili bolatyndyǵyna toqtalyp ótti.
