Á. Kekilbaıuly qazaq ádebıetin ǵana emes, qazaq saıası oılaý júıesiniń jańa belesterin qamtyǵan jazýshy - Elbasy N. Nazarbaev
ASTANA. Jeltoqsannyń 5-i. QazAqparat /Qanat Mámetqazyuly/ - Á. Kekilbaıuly qazaq ádebıtin ǵana emes, qazaq saıası oılaý júıesiniń jańa belesterin qamtyǵan jazýshy. Búgin zamanymyzdyń zańǵar tulǵasy, belgili jazýshy, qoǵam qaıratkeri, QR Parlamenti Senatynyń depýtaty Ábish Kekilbaevtyń 70-jyldyq mereıtoıyna arnalǵan shyǵarmashylyq keshinde sóz sóılegen QR Prezıdenti Nursultan Nazarbaev osylaı málim etti,
dep habarlaıdy QazAqparat.
«1991 jylǵy jeltoqsan aıynda Almaty qalasyndaǵy Respýblıka saraıynda ótken QR Tuńǵysh Prezıdentiniń ulyqtaý saltanatyndaǵy Á. Kekilbaıulynyń sózi áli esimde. Sonda jurtymyzdyń aldynda tebirene sóz saptaǵan Ábekeń: «Oıdaǵymyz boldy, ortamyz toldy, tóbedegi keldi, tórleskenge renjıtin jaıymyz joq, tek uzaǵynan súıindirgeı! Aq joldyń aldyndamyz, úlken nıettiń ústindemiz», dep tolǵaǵan bolatyn. Qýanyshtan kókirekteri atoı salǵan saltanatty qaýym bul sózdi aq batadaı qabyldady», dedi Elbasy.
Sondaı-aq, N. Nazarbaev táýelsiz Qazaqstannyń qalyptasý jyldaryna kóz júgirte otyryp, sondaı kezeńde Á. Kekilbaıuly sekildi zamandastyrynyń bolǵanyna shúkirlik bildirdi. Memleket qurýdyń aýyr jolynda kúrdeli mindetterdi júzege asyrý kezinde Á. Kekilbaıulynyń janynan tabylǵanyn rızashylyqpen eske aldy.
«Ábekeń qaı qıyrǵa salsań da - qııadan kórindi, qaı tereńge salsań da - boılatyp ta, oılantyp ta shyǵa bildi. Oıyndaǵynyń oraıyn tapty, qaı iste de qaıratkerlik pen erik-jigeriniń úlgisin kórsetti. Memlekettik, qoǵamdyq qyzmettiń alasapyranynda júrip, qalamyn odan ári ushtaı berdi. Qazaq ádebıetin ǵana emes, qazaq saıası oılaý júıesiniń jańa belesterin qamtıtyn syndarly tolǵaýlar men salmaqty maqalalar jazdy. El men jerdiń búgini men erteńi týraly kósilgen oı, kósemsóz arnady. El taǵdyryn, din taǵdyryn, dil taǵdyryn ushtastyrǵan ulaǵatty pikirler men urymtal oılary jurttyń júregine jetti», dedi N. Nazarbaev.
