Á. Kekilbaıuly qaı qyzmettiń tizginin ustasa da halqyna degen perzenttik paryzdan eshbir aınyǵan joq - N. Nazarbaev
ASTANA. Jeltoqsannyń 5-i. QazAqparat /Qanat Mámetqazyuly/ - Á. Kekilbaıuly qaı qyzmettiń tizginin ustasa da joǵary jaýapkershilik, halqyna degen perzenttik paryzdan eshbir aınyǵan joq. Búgin belgili jazýshy, qoǵam qaıretkeri, QR Parlamenti Senatynyń depýtaty Ábish Kekilbaevtyń 70-jyldyq mereıtoıyna arnalǵan shyǵarmashylyq keshinde sóz sóılegen Elbasy Nursultan Nazarbaev osylaı málim etti,
dep habarlaıdy QazAqparat.
«Biz el bolyp birlese, bir jaǵadan bas, bir jeńnen qol, bir aýyzdan sóz shyǵaryp - Táýelsizdiktiń tuǵyryn bekite bermekpiz. Jańa myńjyldyqtyń jańa paraǵyn ashtyq. Halqymyzdyń aýyzbirligi men eńbekqorlyǵy arqasynda osynaý 18 jylda ǵasyrǵa teń jyldardy artqa tastadyq. Mine, osy jetistikter men tabystardyń barlyǵy da elimizdegi esimi belgili azamattardyń eren eńbekteriniń nátıjesinde júzege asty. «Bitken iske synshy kóp», deıdi halqymyz. Elimiz úshin asa mańyzdy tarıhı syn kúnderi meniń janymda bolyp, jasampazdyqpen eńbek etken, qoldaǵan, qıyn-qıly kúnderde adaldyǵyn kórsetken seriktesterim barshylyq. Sondaı seriktes jandardyń mańdaı teri men qosqan úlesin osyndaı arqaly jıyn, abyroıly keshterde aıtyp ótý kerek», dedi Elbasy.
«Basqarý degenimiz - túzeý» dep Konfýtsıı aıtqandaı, biz qatelese júrip, túzeldik. Á. Kekilbaıuly memlekttik keńesshi, ulttyq saıasattyń uranshysy, kásibı Parlamenttiń tuńǵysh tóraǵasy bolyp, parlamentarızmniń qalyptasýyna úles qosty. Qaı qyzmettiń tizginin ustasa da joǵary jaýapkershilik, halqyna degen perzenttik paryzdan eshbir aınyǵan joq», dedi N. Nazarbaev.
