A.Qasteev atyndaǵy murajaı balalar úshin merekelik, tanymdyq is-sharalar ótkizýde
ALMATY. 1 maýsym. QazAqparat /Názıra Eleýhan/ - Búgin Almatyda A.Qasteev atyndaǵy memlekettik óner murajaıynda Halyqaralyq balalardy qorǵaý kúnine arnalǵan merekelik is-sharalar ótip jatyr.
Merekelik sharaǵa balalar jáne shyǵarmashylyq, óner, sýret stýdııalarynyń oqýshylarymen qatar mektep jáne gımnazııanyń oqýshylary da shaqyrylǵan.
Óner murajaıy balalar úshin qyzyqty baǵdarlamalar daıyndaǵan. Tańǵy saǵat 10-nan bastap munda «A.Qasteev shyǵarmashylyǵy» jáne «Qazaqstandaǵy beıneleý óneri» atty orys jáne qazaq tilinde dárister, «Meniń balalyq shaǵymnyń álemi» atty baıqaýlar, «Árqashan kún sónbesin» degen ataýmen asfalt ústindegi sýret baıqaýlary ótti. Tústen keıin balalar shyǵarmashylyǵy boıynsha sheberlik synyptar, «Natıýrmort óneri» atty dárister ótkiziletin bolady. Kelemin deýshi balalar úshin esigin aıqara ashqan murajaı bunymen qatar, balalar hıt ánderinen quralǵan bı keshin, ertegi keıipkerlerimen kezdesýler, bodı-art, feıs-art, merekelik áýe sharyn aspanǵa ushyrý jáne taǵy da basqa kóptegen sharalardy uıymdastyratyn bolady. Sharaǵa qatysý tegin.
«Ár halyqtyń, ár ulttyń, adamzat qoǵamynyń erteńgi kúnge úmit artar senimi de, serigi de, ómiri de - balalar. Búgingi sábı - erteńgi urpaqtyń jalǵasy, bizdiń bolashaǵymyz. Sondyqtan, búgingi tamasha mereke de, bazarlyq ta, syılyq ta ónerli balalarymyz úshin jasalynyp otyr»,-dedi A.Qasteev atyndaǵy memlekettik óner murajaıynyń dırektory Baqyt Seralıev.
