Á.Qaranyń «Túrkistan legıonynyń aqıqaty» kitaby jaryq kórdi
ASTANA. 8 aqpan. QazAqparat /Arman Asqarov/ - Búgin Astanadaǵy «Otyrar kitaphanasy» ǵylymı ortalyǵynda belgigi shoqaıtanýshy-ǵalym, professor Ábdiýaqap Qaranyń «Mustafa Shoqaı» jáne «Túrkistan legıonynyń aqıqaty: svastıka men qyzyl juldyz arasyndaǵy jantalas» dep atalatyn eki kitabynyń tanystyrylymy ótti.
Qalamgerdiń «Túrkistan legıonynyń aqıqaty: svastıka men qyzyl juldyz arasyndaǵy jantalas» zertteý eńbeginde Túrkistan legıonerleriniń taǵdyry týraly baıandalyp, sol bir surapyl soǵystyń beımálim tustary ashylady. Á.Qara jazýshy Shyńǵys Daǵshynyń soǵys jyldary bastan ótkergen adam sengisiz oqıǵalary arqyly svastıka men qyzyl juldyzdyń qyspaǵynda qalyp, jazyqsyz japa shekken myńdaǵan legıonerdiń taǵdyr taýqymeti týraly baıandaıdy. Jalpy sany 5 mln. 162 myń bolǵan adamdardyń 1 mln. 981 myńy lagerlerde kóz jumdy. Al tutqyndardy belgilengen jerlerge jóneltý kezinde ólgender men joǵalyp ketkenderdi qosa sanasaq, bul san 3 mln.-nan asady. Tiri qalǵan 800 myńdaı ásker «Tutqyndardan jasaqtalǵan legıondar» jobasyna qoldanylǵan bolatyn.
«Zertteý jumystary barysynda men Shyńǵys Daǵshymen tanystym. Ol - soǵystyń aşy shyndyǵyn jazǵan belgili jazýshy. Men kókeıimde júrgen biraz suraqtardyń jaýabyn osy kisiniń romandarynan taptym», - deıdi Á.Qara.
