Á.Isekeshev: Jyl basynan 500-den astam ınvestorǵa «bir tereze» ustanymy arqyly qyzmet kórsetildi

ASTANA. QazAqparat - Jyl basynan 500-den astam ınvestorǵa «bir tereze» ustanymy arqyly qyzmet kórsetildi. Bul týraly búgin Astana ekonomıkalyq forýmy aıasyndaǵy Investıtsııalyq sammıtte QR Investıtsııalar jáne damý mınıstri Áset Isekeshev málim etti.

«Jyl basynan bastap «bir tereze» ustanymy boıynsha 500-den astam ınvestorǵa qyzmet kórsetildi. Jańa ádistiń taıaý bolashaqta óz nátıjesin kórsetetindigin jáne bizdiń osy jerde, Qazaqstanda ınvestıtsııalyq serpilisti kóretindigimizge senimdimin», - dedi mınıstr.

Onyń atap ótýinshe, Sheteldik ınvestorlar keńesine Prezıdenttiń ózi tóraǵalyq etedi. Munan bólek, Premer-Mınıstr janynan Investıtsııalyq ahýaldy jaqsartý keńesi qurylǵan.

«Men ınvestıtsııalyq ombýdsmenmin. Bul suhbat alańy Qazaqstandaǵy ınvestıtsııalyq qyzmet barysynda týyndaıtyn problemalyq máselelerdi jedel sheshýge baǵyttalǵan», - dedi Á.Isekeshev.