Á. Isekeshev Qazaqstanda týrızm salasyn damytýdyń úsh stsenarııin atady
ASTANA. QazAqparat - Búgin Májilistegi Úkimet saǵatynda elimizdegi týrızm salasyn damytý perspektıvalary jaıynda baıandaǵan QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev bul baǵyttaǵy úsh stsenarıı týraly aıtty.
«Búgingi tańda álemdik ekonomıka damýy ońaı bolyp otyrǵan joq, jahandyq jaǵdaıdyń odan ári qalaı órbıtini de ázirshe túsiniksiz. Osynyń bári el bıýdjetine áser etpeı qoımaıdy. Sondyqtan da, biz týrızm salasynyń damýyna qatysty yqtımal úsh stsenarııdi negizge aldyq. Onyń birinshisi - pessımıstik stsenarıı, bul rette búgingi deńgeımen damý boljanyp, memlekettik qoldaý sonshalyqty qamtylmaıdy. Osylaı bolsa, jeke sektor ınvestıtsııasy 2020 jylǵa qaraı shamamen 2 mıllıard dollar quraýy múmkin, al týrızmniń jalpy ishki ónimdegi úlesi 1 paıyzǵa jetip, 56-60 myńǵa tarta jumys oryndary qurylady. Ekinshi nusqa - memlekettik jáne jeke sektor boıynsha ınfraqurylymǵa ınvestıtsııa qaralady. Onda biz jeke sektordan 4-4,5 mlrd. dollar ınvestıtsııa kútemiz, al týrızmniń jalpy ishki ónimdegi úlesi 1,5 paıyzdy qurap, 150-170 myń jumys orny qurylmaq. Bul - bizge meılinshe jaqyn, meılinshe shynaıy stsenarıı», - dedi Á. Isekeshev.
Sonymen qatar, mınıstr optımıstik stsenarııge de toqtalyp ótti. Bul rettegi boljam boıynsha týrızmniń jalpy ishki ónimdegi úlesi tórt paıyzǵa deıin jetedi. Al jeke ınvestıtsııalar kórsetkishi alty mıllıard dollardy qurap, úsh júz myńǵa tarta jumys oryndary qurylýy múmkin.
«Bul stsenarııde týrızm salasynda memlekettik qoldaý barynsha artady, onyń ishinde qarjylyq qoldaý da keńinen qamtylýy shart», - deıdi Á. Isekeshev.
