Á.Isekeshev ındýstrııalandyrýdyń ekinshi besjyldyǵynyń negizgi tapsyrmalaryn atap berdi
«Budan bylaı avtokólik ındýstrııasynyń kásiporyndary aldyna jeńil jáne kommertsııalyq avtokólikterdi shyǵarýdy ulǵaıtý jáne óndiristi shoǵyrlandyrý tapsyrmasy qoıylady. Bul rette bıznespen birlesip elimizdegi avtokólik óndirisin damytý strategııasy jasalǵan bolatyn. Ol óz kezeginde Qazaqstanǵa kólikterdi tolyq tsıklmen óndirýge jol ashady», - dep atap ótti Á. Isekeshev.
Onyń aıtýynsha, aýylsharýashylyq kesheninde ózdiginen júretin astyq jınaý kombaındary men traktorlaryn, basqa da aýyl sharýashylyq tehnıkalaryn óndirý jumystary uıymdastyrylǵan. 2013 jyly aýyl jáne orman sharýashylyǵyna arnalǵan 1 362 traktor shyǵarylǵan, bul 2008 jylmen salystyrǵanda 5,6 ese kóp.
«Indýstrııalandyrýdyń kelesi besjyldyǵynda mashına jasaý salasynda budan da joǵary kórsetkishterge qol jetkizemiz dep josparlap otyrmyz. 2015-2019 jyldar aralyǵynda avtokólik, elektr jabdyqtaryn, aýyl sharýashylyq tehnıkalaryn, temir jol tehnıkasyn, taý-ken óndirý keshenine jáne munaı óńdeý men munaı óndirý ónerkásibine arnalǵan qural-jabdyqtar jasaý salalary boıynsha damytylatyn bolady», - dedi mınıstr.
Á. Isekeshevtiń málimetinshe, birinshi besjyldyqta "SaryArkaAvtoprom", "Azıa Avto", Hyunday Bus Truck syndy avtokólik óndirýshi kompanııalar Úkimet tarapynan úlken qoldaý alyp, qaryshtap damydy.
«Endigi jerde bizge kólik qurastyrý zaýyttaryn jylyna 190 myń dana ónim shyǵaratyn qýattylyqqa jetkizip, shetelderge eksporttaý áleýetin kúsheıtetin shoǵyrlandyrý úlesin ulǵaıtý qajet», - dedi Á.Isekeshev.
Mınıstr munaı-gaz salasynda jáne aýyl sharýashylyǵynda mashına jasaý boıynsha da negizgi baǵyttardy atap ótti.
«Qashaǵan men Teńiz ken oryndaryn damytý barysynda ınvestorlar tartý jáne zamanaýı tehnologııalardy engizý úshin bizge UKP jáne Qazaqstan mashına jasaýshylar odaǵymen birlesip úlken jumystar atqarý kerek. Al aýyl sharýashylyǵy salasynda mashına jasaý boıynsha CLAAS nemese John
Deer sııaqty iri kompanııalardyń birin tartý kózdelýde. Sondaı-aq, temir joldyq mashına jasaý salasynda da álemdik kóshbasshylar - General Electric, Alstom, Siemens, Talgo, Transmashholdıng, General Motors, Bombardier jáne basqa da kompanııalarmen qarym-qatynastar ornatylǵan», - dedi mınıstr.
