A. Esimov: Jekemenshik úılerdi salýǵa jer telimderin berýdi shekteý qajet
ALMATY. 21 jeltoqsan. QazAqparat - Búgin Almatyda ońtústik astananyń jer telimderin jáne qala mańy aımaǵyn paıdalaný máseleleri jóninde ótken keńeıtilgen otyrysta qala ákimi Ahmetjan Esimov jekemenshik úılerdi salýǵa jer telimderin berýdi shekteý qajettigin málimdedi.
«Bizdiń bas josparymyz bar. Soǵan sáıkes qaı jerde ne salynatyny jazylǵan. Eger osy bas josparda qajet etkenderge berýge bolatyn bos jer telimderi bar bolsa, bul - bir másele. Barlyq jer baıaǵyda satylyp ketken, olar jekemenshik bolyp tabylady jáne quny óte joǵary. Ákimdik zańǵa sáıkes ózderiniń jerlerin talap etetin azamattardyń ótinishterin qalaı oryndaıdy? Eger bul norma qoldanysta júretin bolsa, onda adamdar senedi», - dedi A.Esimov. Ol búgingi kúni ákimdikke óz jerin alǵysy keletin qalalyqtardan 110 myń ótinish kelip túskenin habarlady.
