A. Esimov Almatydaǵy birqatar áleýmettik nysandardy aralady
ALMATY. 23 mamyr. QazAqparat /Názıra Eleýhan/ - Almaty qalasynyń ákimi Ahmetjan Esimov senbi kúni birqatar áleýmettik nysandarda jumys saparymen boldy, ol jańa mýnıtsıpaldy avtobýs parkiniń jumysymen tanysyp, № 11 ıaslı-balabaqshany, «Magným», «Metro», «Mango» saýda ortalyqtaryn, kógaldandyrý jumystary júrgizilgen qala saıabaqtaryn aralap kórdi.
Almaty qalasy ákimdiginiń sharýashylyǵyn júrgizýge quqyly «AlmatyElektroTrans» (Kommýnaldy avtobýs parki) óz jumysyn ótken jyldyń sáýir aıynda bastaǵan bolatyn, qazir birqatar tájirıbe jınaqtap aldy. Ekologııalyq otyn -gazben júretin jańadan alynǵan 200 avtobýs qala turǵyndaryna qyzmet kórsetýde. Qazir olardyń 170-i qaladaǵy 8 baǵytta júrýde. Keıin kelgen avtobýstar dıagnostıkadan ótip, kelesi aptada jolǵa shyqpaq. Avtopark kúnine 1 mln. jolaýshyny tasymaldaıdy. Ár avtobýsta valıdator bar. Kúndik ortasha tabys kólemi 31 myńnan 42 myń teńgeni quraıdy. Al jeke avtoparkterdiń kúndik tabysy - 20 myń teńgeni quraıdy eken. Qalalyq avtopark shtatynda 400 júrgizýshi bar. Júrgizýshilerdiń aılyq jalaqysy 120-160 myń teńge aralyǵynda. Avtoparkte avtobýstar kóliginiń jumys isteýin baqylap otyratyn 16 beınekamera men medpýnkt bar. Sonymen qatar, ár avtobýstyń baǵytyn, qozǵalysyn kórsetip otyratyn jabdyqtar da jumys isteıdi. Dıspetcher elektrondy aqparat arqyly reıs týraly tolyq maǵlumat alyp otyrady. Qajet bolǵan jaǵdaıda júrgizýshini aýystyratyn ekinshi júrgizýshi de daıyn. Óndiris korpýsy qajetti jabdyqtarmen tolyq qamtamasyz etilgen, munda Germanııadan ákelingen avtojýý qurylǵysy jumys isteıdi.
Qala ákimi mýnıtsıpaldy avtoparktiń mindeti barynsha sapaly qyzmet kórsetý ekendigin atap ótti. " Óz baǵyttary boıynsha jumysqa shyqqan avtobýstardyń bárinde mindetti túrde valıdator bolýy shart jáne servıs barynsha joǵary bolýy tıis",-dep atap ótti avtoparktiń jumysymen tanysqan qala basshysy.
Qala basshysy sonymen qatar, Almaly aýdanyndaǵy № 11 balabaqshada boldy. Atalmysh mekeme 1964 jyly salynǵan bolatyn. Munda 1989 jyly jóndeý jumystary júrgizilgen. Nátıjesinde, ınjenerlik jeliler, tehnologııalyq qondyrǵylar tolyq jańartylǵan. Munda tuńǵysh ret energııa jınaǵysh tehnologııa men avtomattandyrylǵan jylý pýnkti jumys isteýde, sonyń arqasynda jylý energııasynyń 15 paıyzy únemdelýde. Bala- baqshanyń azyq-túlik blogynda álemniń aldyńǵy qatarly óndirýshileriniń jabdyqtary qoıylǵan. Balabaqsha sonymen qatar, óte sapaly jıhazdarmen jabdyqtalǵan.
Óziniń jumys sapary barysynda qala ákimi sondaı-aq, megapolıste sońǵy úsh aı ishinde ashylǵan «Magným», «Metro», «Mango» saýda ortalyqtary mańynda kógaldandyrý jumystary júrgizilgen qala saıabaqtarynda, sondaı-aq, «Kóktem-1» yqsham aýdanynda, Músirepov pen Buqar jyraý kósheleriniń boıynda ashylǵan jańa saıabaqtarda boldy.
Ahmetjan Esimov ákimdiktiń qaladaǵy barlyq saýda júıelerin órkenıettik deńgeıge jetkizý úshin qoldan kelgenniń bárin jasaıtyndyǵyn aıtty, bul oraıda qaladaǵy 34 bazar qaıta jasaqtalatyn bolady.
Búginde qalany abattandyrý men kóriktendirý baǵytynda birqatar oń sharalar júzege asýda. Qazir qalanyń basqa aýmaqtarynda abattandyrý men kógaldandyrý boıynsha jobalyq-smetalyq qujattar daıyndalý ústinde. Ahmetjan Esimov qalada júrgizilip jatqan jumystardyń basty baǵyttarynyń biri kógaldandyrý ekendigin atap ótti. Sońǵy eki jyl ishinde bul oraıda kólemdi jumystar júzege asýda. Qalada eski aǵashtar jańalarmen almastyrylyp, jas aǵashtar boı kótere bastady. 2011 jyly Almatyda jergilikti bıýdjet pen qaıtalap aǵash otyrǵyzý esebinen 27 myń túp aǵash otyrǵyzyldy, onyń 2716-y jaı japyraqty, 1365 -y qylqan japyraqty, 16 410 butalar. Qaıtalap aǵash otyrǵyzý esebinen bıyl 7 myń túpten astam aǵash otyrǵyzylmaq.
