A.Esimov: 2022 jylǵy Qysqy Olımpıadany Almatyda ótkizý ótinimi boıynsha belsendi jumys atqarý kerek
ALMATY. QazAqparat - Búgin Almatyda qala ákimi Ahmetjan Esimov pen Qazaqstan Respýblıkasy Sport jáne dene shynyqtyrý isteri agenttiginiń tóraǵasy Tastanbek Esentaevtyń tóraǵalyq etýlerimen 2022 jylǵy HHІÚ qysqy Olımpıadany Almatyda ótkizý jónindegi ótinimdi ilgeriletý jónindegi jumys tobynyń otyrysy bolyp ótti. Bul týraly Almaty qalasy ákiminiń baspasóz qyzmetinen málimdedi.
Buryn habarlanǵanyndaı, 7 shildede Halyqaralyq Olımpıada komıtetiniń Atqarýshy komıteti 2022 jylǵy qysqy Olımpıadany ózderinde ótkizý múmkindigine ıe bola alatyn úmitker qalalar retinde Almaty, Oslo jáne Beıjińdi resmı túrde bekitken bolatyn.
Jıyn barysynda qazaqstandyqtardyń Olımpıada oıyndaryn Almatyda ótkizýdi qoldaıtyndyqtary atalyp ótti. «Pablık Opınıon Bıýro» Halyqaralyq saraptamalyq agenttigi júrgizgen saýaldar qorytyndysy boıynsha azamattardyń basym kópshiligi 2022 jylǵy qysqy Olımpıadany ótkizýge qoldaý bildirgen.
Otyrys barysynda Uıymdastyrý komıteti men onyń atqarýshy organynyń uıymdastyrý-quqyqtyq formasyn anyqtaý máselesi talqylandy. Jumysshy toby Qazaqstan Úkimetine Uıymdastyrý komıteniń quramy men komertsııalyq emes Korporatıvti Qor qurý jónindegi óz usynystaryn jiberedi.
Almaty ákimi 2022 jylǵy Qysqy Olımpıada astanasy týra bir jyl ótken soń anyqtalatyndyǵyn, onyń Malazııanyń Kýala-Lýmpýr qalasynda 2015 jyldyń 31 shildesinde jarııalanatyndyǵyn atap ótti. Sondyqtan Ahmetjan Esimov jıynǵa qatysýshylarǵa «Almaty-2022» ótinim bildirý kompanııasynyń ekinshi kezeńiniń jumysyn barynsha jandandyra túsýdi tapsyrdy.
Otyrysqa memlekettik jáne jekemenshik sport nysandarynyń basshylary da qatysty. Barlyq sport nysandarynyń, stýdenttik sporttyń halyqaralyq Federatsııasynyń (FISU) jáne Halyqaralyq Olımpıada Komıteti talaptarynyń standarttary men normalaryna saı bolýy tıis ekendikteri atap kórsetildi.
«Qazir atqarylýy tıis barlyq jumystar tizimi jasalyp, olar qysqa merzim ishinde oryndalǵany jón. Almatyda ótetin barlyq iri halyqaralyq jarystardy FISU men HOK-niń sarapshylary baqylaıtyn bolady», - dedi sóz sońynda Ahmetjan Esimov.
