Á.Bókeıhan murasynyń tuńǵysh tolyq jınaǵy jáne tulǵalyq entsıklopedııasy jaryq kóredi
ASTANA. QazAqparat - L.N.Gýmılev atyndaǵy Eýrazııa ulttyq ýnıversıteti janyndaǵy «Alash» ǵylymı-zertteý ınstıtýty Álıhan Bókeıhannyń 150 jyldyǵyna arnap óz tarapynan birqatar jumysyn ázirleý ústinde. Atap aıtqanda, jyl sońyna qaraı, Alash kóseminiń qazaq jáne orys tilderindegi murasynyń tolyq jınaǵyn baspaǵa usynýdy josparlap otyr. Dál qazir jınaqtyń naqty qansha tom bolatynyn kesip aıtý qıyn. Ol qurastyrý barysynda aıqyndalady, dep jazady aikyn.kz.
Sonymen qatar «Alash» ınstıtýty «Álıhan Bókeıhan» tulǵalyq entsıklopedııasyn qurastyrýdy qolǵa aldy.
Entsıklopedııa - óte kúrdeli ǵylymı eńbek. Sol sebepti de ony qurastyrýǵa eldegi jekelegen alashtanýshy ǵalymdardan, ǵylym men bilimniń san salasynyń mamandarynan bastap Almatydaǵy Sh.Ýálıhanov atyndaǵy tarıh jáne etnologııa, M.O.Áýezov atyndaǵy ádebıet jáne óner ınstıtýttary, Astanadaǵy memleket tarıhy ınstıtýty, Semeıdegi Alashtaný ǵylymı ortalyǵy syndy ǵylymı-zertteý mekemeleriniń ujymdary atsalyspaqshy.
«Alash» ınstıtýty tulǵalyq entsıklopedııanyń 3367 sózden turatyn sóztizbesin (slovnık) qurastyrýdy aıaqtap baspaǵa usynyp, taıaý kúnderi jaryqqa shyǵady.
