Á. Bımendına bilim berý salasyndaǵy jemqorlyqtyń negizgi sebepterin atady
ASTANA. 11 qazan. QazAqparat - Búgin QR Ekonomıkalyq jáne sybaılas jemqorlyqqa qarsy kúres agenttiginiń bastamasymen ótken semınar-dáriste Astana qalasy Bilim berý basqarmasynyń bastyǵy Ásıma Bımendına osy saladaǵy tártip buzýshylyqtyń negizgi sebepterin atap berdi.
Onyń aıtýynsha, elordada bilim berý mekemeleriniń sany jyl sanap ósip keledi. Al onyń barlyǵyn kásibı mamandarmen der kezinde qamtamasyz etý qıyn. «Shyny kerek, osy sanattaǵy tártip buzýshylyqtardyń sıpaty alýan túrli bolyp keledi. Onyń negizgi sebebi - qyzmetkerlerdiń zańnamany (sybaılas jemqorlyq týraly - avt.) bilmeýi, olardyń qarjy jaǵynan saýatsyz bolýy. Mine, dál sonyń saldarynan quqyq buzýshylyqtardyń basym bóligi bolyp jatady. Máseleniń taǵy bir jaǵy - bıýdjettik josparlaýdyń durys bolmaýy. Kóbisi bas kezinde qarjyǵa tapsyrys berip qoıady da, jyldyń sońynda onyń barlyǵyn tolyǵymen ıgere almaı jatady», - deıdi Á. Bımendına. Budan basqa, bilim berý mekemeleriniń qyzmetkerlerin jumysqa alý, olarǵa syıaqy taǵaıyndaý jáne eńbekaqy berý jaǵynan tártip buzý oqıǵalary jıi kezdesedi.
