A. Beısenbaev: Ata Zań - egemen Qazaq eliniń basty jetistikteriniń biri

ASTANA. QazAqparat - Ata Zań jańa tarıhı kezeńdegi tutastaı qazaqstandyq qoǵamnyń tuǵyrnamasyna aınaldy. Búgin Parlament Senatynda «Konstıtýtsııaǵa 20 jyl: quqyqtyq memleket ınstıtýty jáne zań shyǵarmashylyq protsesi» atty taqyrypta ótken halyqaralyq konferentsııa barysynda Senat Tóraǵasynyń orynbasary Asqar Beısenbaev osylaı málim etti.

«1995 jylǵy 30 tamyz - búkil Qazaqstan halqy úshin tarıhı kún. Bul kúni respýblıkalyq referendýmda jańa, Negizgi Ata Zań qabyldandy. Taǵdyry ortaq Qazaqstan halqy durys tańdaý jasaǵanyn osy ótken 20 jyldyq kezeń dáleldep berdi», - dedi jıyn barysynda vıtse-spıker Asqar Beısenbaev.

Senator sonymen birge, jas Qazaqstannyń Konstıtýtsııasy memlekettiliktiń irgeli negiz qalaýshy ınstıtýttarynyń damýshy kúshi bolyp tabylatyndyǵyn, jańa tarıhı kezeńdegi tutastaı qazaqstandyq qoǵamnyń qundy tuǵyrnamasyna aınalǵanyn atap ótti.

«Adam men azamattyń quqyqtary men bostandyqtary, qoǵamdyq kelisim, erkin saılaý ótkizý, memelkettik bılik birligi, jergilikti basqarý jáne jergilikti ózin-ózi basqarý júıesiniń jumys isteý qaǵıdattary basty nazarǵa qoıyldy. 1995 jylǵy Konstıtýtsııa egemen Qazaq eliniń basty jetistikteriniń biri. Jalpyadamzattyq qundylyqtar men jalpy demokratııalyq qundylyqtarǵa negizdelgen Konstıtýtsııanyń qabyldanýy memelktetik qurylystyń quqyqtyq negizin qalady», - dedi A. Beısenbaev.

Sonymen qatar, vıtse-spıker Konstıtýtsııaǵa sáıkes qurylǵan qos palataly júıedegi qazaqstandyq parlamentarızmniń róline toqtala kele, Ata Zań arqasynda negizgi zań talaptaryna jaýap beertin jańa quqyqtyq júıeniń qurylǵanyn da málim etti.