Á. Báımenov: Memlekettik qyzmette týysty tartý «dástúrin» joıýǵa ábden bolady
ASTANA. 7 qarasha. QazAqparat - Memlekettik qyzmette týysty tartý «dástúrin» joıýǵa ábden bolady. Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Memlekettik qyzmet isteri agenttigi tóraǵasy Álıhan Báımenov osylaı málimdedi.
Toqtala ketetin jaıt, qujatty talqylaý barysynda depýtat Darıǵa Nazarbaeva zań jobasyna sáıkes memlekettik qyzmetke usynýda týystyq, berilgendik belgilerine tosqaýyl qoıylatynyna toqtalyp: «Siz ózińiz buǵan senesiz be?» dep suraǵan edi. «Bizdiń osyndaı memlekettik qyzmette qalyptasqan «dástúrli mehanızmdi» qurtý úshin ne isteý kerek?» dep surady D. Nazarbaeva.
«Óz basym buǵan senemin, Darıǵa Nursultanqyzy. Ondaı jaǵymsyz qubylys tómendeıtinine senemin. Meniń memlekettik qyzmet isteri agenttigine 11 jyldan soń basshy retinde qaıta oralýyma oraı, salystyrý múmkindigim boldy dep oılaımyn. Qoldanystaǵy zańdy qabyldaǵannyń ózinde birqatar jaǵymsyz qubylystar da tómendegen. Onyń ishinde, basshynyń aýysýyna baılanysty aýys-túıis 3 esege azaıdy. Qazir 90-shy jyldarǵa qaraǵanda eńbek resýrsynyń, adamı resýrstyń shektiligine baılanysty basshylardyń ózi qaramaǵynda bilikti kadrlar bolǵanyn qalaıdy. Adamı resýrstardyń ózi shyn máninde jetkiliksiz. Óıtkeni, birneshe márte memlekettik organdardy qysqartýlar da boldy. Jalpy tıimdi kadrlyq resýrstar basshynyń aldyna júktelgen mindetterdi nátıjeli oryndaýǵa múmkindik beredi», - dedi Álıhan Báımenov.
Agenttik tóraǵasynyń aıtýynsha, atalǵan másele eń aldymen memlekettik qyzmettegi korporatıvtik mádenıetti joǵarylatýmen baılanysty. «Bul barlyq memlekettik organdardyń kúsh jumyldyrýymen udaıy ári satylap júzege asýy tıis shara.», - dedi agenttik tóraǵasy.
