Á.Baıǵazınniń «Úndestik sabaqtary» atty týyndysy AQSh-tyń Tribeca kınofestıvalinde kórsetiledi
ASTANA. 19 sáýir. QazAqparat - Sháken Aımanov atyndaǵy «Qazaqfılm» kınostýdııasy shyǵarǵan Ámir Baıǵazınniń «Úndestik sabaqtary» («Ýrokı garmonıı») atty alǵashqy kınotýyndysy 17-29 sáýir aralyǵynda AQSh-tyń Nıý-Iork qalasynda ótetin Tribeca kınofestıvaliniń «Kózqaras» atty arnaıy baǵdarlamasynda kórsetiledi.
Atalǵan sektsııada kórermender nazaryna 14 kórkem jáne 8 derekti fılm usynylady, dep habarlady kınostýdııanyń baspasóz qyzmetinen.
Esterińizge sala ketsek, «Úndestik sabaqtary» jobasy 2011 jyly VII Halyqaralyq «Eýrazııa» kınofestıvali sheńberinde ótkizilgen «Qazaqstandyq kınojobalar naryǵynda» («Spotlight: New Kazakh Cinema»), úzdik dep tanylyp, «Qazaqfılm» kınostýdııasynyń qarjylaı qoldaýyna jáne halyqaralyq deńgeıde tanylýyna múmkindik alǵan bolatyn.
Fılmdi túsirý jumystary 2012 jyldyń shilde aıynda aıaqtaldy. Birneshe kúnnen keıin fılmniń alǵashqy kadrlary Saraevo qalasynda (Bosnııa jáne Gertsegovına) ótken Halyqaralyq kınofestıvalde kórsetilip, Work-in-Progress konkýrstyq baǵdarlamasynda Bas júldeni jeńip aldy. Kóp uzamaı, «Berlınale Álemdik Kıno Qory» (Berlinale World Cinema Fund) taǵaıyndaǵan júldege qol jetkizdi. Sonymen qatar, 63-shi Berlın kınofestıvalinde «Úzdik operator» atalymynda «Kúmis aıý» júldesimen marapattaldy. Jalpy, bul fılm - joǵaryda atalǵan qordyń qoldaýyna ıe bolǵan alǵashqy qazaqstandyq joba.
