A. Aıtaly: Eger barlyq qazaq qazaqsha sóılese, memlekette qazaq tili máselesi bundaı ótkir bolmas edi
ASTANA. Shildeniń 26-sy. QazAqparat /Rýslan Ǵabbasov/ - Qazaq bilmeı, qazaq tiliniń bolashaǵy bolmaıdy. Bul týraly búgin Úkimette Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalaǵan otyrysta belgili qoǵam qaıratkeri, professor Amangeldi Aıtaly aıtty.
Kúni búginge deıin «Til týraly» zańnyń 23-shi baby iske aspaı kele jatqanyna toqtalǵan ol, bul bapty osy baǵdarlamaǵa engizý kerektigin jetkizdi.
«Eger barlyq qazaq qazaqsha sóılese, memlekette qazaq tili máselesi bundaı ótkir bolmas edi. Sondyqtan biz jasaǵan zań jobasy birinshiden barlyq qazaq memlekettik tildi bilýge jáne tildi meńgergennen keıin laýazymdy, sondaı-aq basqa jumysqa barýdy mindetteıdi. Qazaqtyń ózi bilmeı, qazaq tiliniń bolashaǵy bolmaıdy», - dep toqtaldy A. Aıtaly.
Áleýmettik zertteýlerge toqtalǵan ǵalym, « Búginde Qazaqstannyń 63-65 paıyzyn quraıtyn qazaqtar memlekettik qyzmette 85 paıyzdan asyp bara jatyr. Qazaq jastarynyń birqatary memlekettik qyzmette. Olardyń qazaq tilin bilmegendigi - bul qazaq halqynyń namysyna tıedi. Oǵan qazaq maqtanyp otyrǵan joq», dedi. «Sondyqtan memlekettik tildi damyta otyryp, memlekettik qyzmet bolsyn, sondaı-aq basqa da qyzmetterge ultyna qaramaı memlekettik tildi jaqsy meńgergen adamdardy tartý kerek»,- dedi ol.
A. Aıtaly: "osy oraıda ǵana elimizdegi birlik pen tatýlyq arta túsedi", dep qadap aıtty.
