A.Atambaev pen V.Pýtın ekonomıkalyq ıntegratsııanyń aldaǵy bolashaǵyn talqylady
BІShKEK. 21 naýryz. QazAqparat - Qyrǵyzstan Prezıdenti Almazbek Atambaev óziniń Máskeýge jasaǵan saparynyń barysynda Reseıdiń jańadan saılanǵan prezıdenti Vladımır Pýtınmen kezdesti.
A.Atambaev V.Pýtındi Reseı prezıdentiniń qyzmetine saılanýymen quttyqtady. Óz kezeginde V.Pýtın Qyrǵyzstan jáne Reseı arasyndaǵy dıplomatııalyq qatynastardyń ornaǵanyna 20 jyl tolǵanyn atap ótti.
«Bizdiń bir-birimizdi quttyqtaýǵa sebebimiz bar. Biz qatynastarymyzdy damytyp, bir-birimizge kómektesip durys jasadyq. Maǵan Qyrǵyzstannyń tek Reseımen ǵana emes, Kedendik odaqpen, biryńǵaı ekonomıkalyq keńistikpen jaqyndasý boıynsha aıqyndamańyz tanys», - dedi V.Pýtın.
«Biz úshin Reseı - strategııalyq seriktes. Aldymyzda yntymaqtastyqtyń jańa deńgeıi bolýy tıis», - dep jaýap berdi A.Atambaev.
Kezdesý barysynda Almazbek Atambaev pen Vladımır Pýtın aldaǵy ekonomıkalyq ıntegratsııa úshin praktıkalyq qadamdardy talqylady. Taraptar Qyrǵyzstan ekonomıkasynyń túrli sektorlaryndaǵy buǵan deıin qol jetkizilgen ınvestıtsııalyq ýaǵdalastyqtardy tezirek iske asyrý qajettigin, sondaı-aq eki el arasyndaǵy ıntegratsııalyq úrdisterdiń mańyzyn atap ótti.
