9 mln kóshet, 2 myń gektar orman: Qazaqstannyń ekologııalyq jobasy halyqaralyq alańda tanystyryldy

Joba BUU-nyń Klımattyń ózgerýi jónindegi negizdemelik konventsııasy taraptarynyń 31-konferentsııasynda Qazaqstannyń ulttyq pavılonynyń ekologııalyq bastamalary qataryna endi.

COP31 klımattyq syn-qaterler men turaqty damý salasyndaǵy sheshimderdi talqylaý úshin memleketter men úkimet basshylaryn, halyqaralyq uıymdardyń, qarjy ınstıtýttarynyń, ǵylym jáne bıznes ókilderin biriktiredi. Bıyl konferentsııaǵa 70-ten astam memlekettiń ókilderi qatysyp jatyr.

Aýmaǵy 250 sharshy metrdi quraıtyn Qazaqstannyń ulttyq pavılony tabıǵatty qorǵaý bastamalaryn, jańa tehnologııalar men ınvestıtsııalyq jobalardy tanystyrý alańyna aınaldy. Onyń baǵdarlamasyna 38 taqyryptyq is-shara engizilgen. Halyk Ormany jobasynyń halyqaralyq is-sharaǵa qatysýy Qazaqstannyń ormandy qalpyna keltirý baǵytyndaǵy tájirıbesin halyqaralyq deńgeıde talqylaýǵa, usynylǵan ózge de bastamalarmen qatar tanystyrýǵa múmkindik beredi.

Qazaqstanda 9 mln túp aǵash otyrǵyzylady

Halyk qaıyrymdylyq qory Qamqorshylyq keńesiniń múshesi, Halyk Bank basqarma tóraǵasy Úmit Shaıahmetova COP31 aıasynda Qazaqstan Premer-mınıstri Oljas Bektenovke Halyk Ormany jobasy týraly aıtyp berdi.

Tımýr Qulybaevtyń Halyk qaıyrymdylyq qory bul baǵdarlamany Qazaqstannyń Ekologııa jáne tabıǵı resýrstar mınıstrligimen birlesip júzege asyryp jatyr. Onyń geografııasy «Semeı ormany» memlekettik orman tabıǵı rezervatyn, Іle-Alataýy ulttyq parki men Astana qalasynyń jasyl beldeýin qamtıdy.

Joba bes jylǵa josparlanǵan. Ol aǵash otyrǵyzýdy ǵana emes, sonymen birge aýmaqtardy daıyndaýdy, otyrǵyzylatyn materıaldardy ósirýdi, jasyl jelekterdi kútýdi jáne olardyń jersinýin baqylaýdy kózdeıdi. Mundaı tásil jumystardy birneshe maýsymǵa aldyn ala josparlaýǵa, sondaı-aq otyrǵyzylǵan kóshetterdiń sanyna ǵana emes, olardyń ári qaraı ósýine qolaıly jaǵdaı jasaýǵa múmkindik beredi.

Úmit Shaıahmetova keshendi tásil baǵdarlamanyń basty ereksheligi ekenin atap ótti.

— Halyk Ormany jobasynyń ereksheligi ormandy qalpyna keltirýge keshendi tásil qoldanýynda ekenin atap ótý asa mańyzdy. Baǵdarlama ormandy qalpyna keltirýdiń barlyq kezeńin qamtıdy. Sapaly otyrǵyzý materıalyn ósirý men aýmaqtardy daıyndaýdan bastap, aǵash otyrǵyzý, jasyl jelekterdi kútý jáne olardyń jersinýin baqylaýǵa deıingi jumystar júzege asyrylady, — dedi Úmit Shaıahmetova.

Eki jylda 3 mıllıonnan astam kóshet otyrǵyzyldy

Baǵdarlamanyń mańyzdy baǵyttarynyń biri — Abaı oblysyndaǵy orman tálimbaqtarynyń ınfraqurylymyn damytý. Sýarý júıelerin jańǵyrtý, jabdyqtardy jańartý jáne óndiristik qýattardy keńeıtý orman alqaptaryn qalpyna keltirýge qajetti kóshetterdi kóbirek ósirýge múmkindik beredi.

2025-2026 jyldary Halyk Ormany jobasy aıasynda «Semeı ormany» aýmaǵynda, Іle-Alataýy ulttyq parkinde jáne Astananyń jasyl beldeýinde 3 mıllıonnan astam kóshet otyrǵyzyldy. Aǵash otyrǵyzý jumystaryna 2 myńnan astam erikti qatysty.

Otyrǵyzylatyn materıaldaryn aldyn ala daıyndaý jáne aǵashtardy keıinnen kútip-baptaý ormandy uzaq merzimdi qalpyna keltirý júıesin qalyptastyrýǵa kómektesedi. Joba tabıǵı aýmaqtardaǵy praktıkalyq jumystardy kóshet otyrǵyzýdy jalǵastyrýǵa qajetti ınfraqurylymdy damytýmen ushtastyrady. Ormandy qalpyna keltirý ýaqytty qajet etetindikten, aǵash otyrǵyzýmen qatar jas ekpelerdiń keıingi jaı-kúıine de erekshe nazar aýdarylady.

Qazaqstan bastamasy halyqaralyq alańda tanystyryldy

Halyk Ormany jobasynyń COP31 konferentsııasynda tanystyrylýy halyqaralyq qoǵamdastyqqa Qazaqstannyń ekologııalyq bastamasynyń nátıjelerimen jáne memleket, qaıyrymdylyq uıymdary, bıznes pen qoǵam arasyndaǵy yntymaqtastyq múmkindikterimen tanysýǵa jol ashty.

Tımýr Qulybaevtyń Halyk qaıyrymdylyq qory úshin klımattyq konferentsııaǵa qatysý óz jumysynyń naqty nátıjelerin jáne eldiń tabıǵı murasyn saqtaýǵa baǵyttalǵan jeke bastamalardyń úlesin kórsetýge múmkindik berdi. Baǵdarlama memlekettik organdar men qoǵam ókilderiniń birlesken jumysy bir ǵana aǵash otyrǵyzý maýsymynda sheshilmeıtin mindetterdi oryndaýda mańyzdy ekenin de kórsetedi.

Bir rettik kógaldandyrý aktsııalarynan ereksheligi — Halyk Ormany jobasy bes jyl boıy orman alqaptaryn júıeli túrde qalpyna keltirýdi kózdeıdi. Baǵdarlama kóshetterdi tálimbaqtarda ósirýden bastap, olardy otyrǵyzǵannan keıin jersinýin baqylaýǵa deıingi barlyq kezeńdi qamtıdy.

2025–2026 jyldary otyrǵyzylǵan 3 mıllıonnan astam kóshet — jobanyń alǵashqy nátıjeleriniń biri. Jalpy baǵdarlama aıasynda 2 myń gektardan astam aýmaqqa 9 mıllıon kóshet otyrǵyzý josparlanǵan.

Halyk Ormany — ormandardy qalpyna keltirýge, ekojúıelerdiń turaqtylyǵyn nyǵaıtýǵa jáne Qazaqstannyń tabıǵı murasyn bolashaq urpaq úshin saqtaýǵa baǵyttalǵan uzaq merzimdi bastama.