99 jastaǵy ájeı kolledj bitirdi
ASTANA. QazAqparat - Amerıkanyń Men shtatynyń 99 jastaǵy turǵyny kolledjdi 75 jyldan keıin aıaqtady, dep habarlady Associated Press. Onyń oqý ornyn ýaqytynda bitirip shyǵýyna 1939 jyly 5 dollar baj salyǵyn tólemeýi kedergi bolǵan.
Djessı Ýaıt Bangore qalasyndaǵy Bıl kolledjinde bilim alǵany jónindegi qujatty alý sharasyna qatysty. Egde jastaǵy túlek stenografııa jáne esep júrgizý boıynsha dáreje aldy.
Ýaıt hanym polıomıelıtpen aýyrady. Soǵan qaramastan uzaq jyldar boıy esep júrgizýshi bolyp qyzmet etken. Onyń baj salyǵy jaıly estigen dosy ony tólep, atalǵan sharany uıymdastyrýǵa kómektesken. Dıplom alǵan áıeldiń sózine qaraǵanda, onyń qýanyshynda shek joq. «Eshqashan oqýdy toqtatpańdar. Bilim alýdy toqtatqanda, adam qartaıady degen sóz bar. Sol sebepti men oqýdy toqtatpaımyn», - deıdi bitirýshi túlek.
