99 paıyz aýyl sharýashylyǵy jerleri memleketten jalǵa alynyp paıdalanylyp otyr - Q. Otarov
ASTANA. 5 qarasha. QazAqparat - Búgingi kúni 99 paıyz aýyl sharýashylyǵy jerleri memleketten jalǵa alynyp paıdalanylyp otyr.
Búgin Parlament Májilisinde ótken Úkimet saǵatynda Jer resýrstaryn basqarý agenttiginiń tóraǵasy Qadyrhan Otarov osylaı málim etti.
Agenttik tóraǵasynyń aıtýynsha, sharýashylyq sýbektileri eń birinshi kezekte ishki jerge ornalastyrý júıesine, onyń ishinde aýyspaly egisterge ózderi qyzyǵýshylyq bildirýi, ıaǵnı múddeli bolýy kerek. Sonymen qatar olardy júrgizý ekonomıkaǵa jáne aýyl sharýashylyǵy óndirisin ár taraptandyrýdyń taǵdyryna baılanysty bolyp tabylady jáne de bul Memleket basshysy turaqty túrde kóterip júrgen óńirlerdegi sharýa qojalyqtary jáne agroqurylymdardy irilendirýge alǵy shart bolyp tabylady.
«Budan tys, atalǵan shara aýyspaly egister engizý jerlerdi josparly túrde jáne tıimdi paıdalanýǵa jol ashady. Sonymen qatar ol aǵymdaǵy jyldyń naýryz aıynda kúshine engen Aýyl sharýashylyǵy maqsatyndaǵy jerdi utymdy paıdalaný qaǵıdalaryn saqtaýǵa yqpal jasaıdy. Osy oraıda, búgingi kúni 99 paıyz aýyl sharýashylyǵy jerleri memleketten jalǵa alynyp paıdalanylyp otyrǵanyn eskersek, bul asa qajetti ózekti másele», - deıdi Q. Otarov.
Onyń aıtýynsha, qazirgi ýaqytta jer ýchaskeleriniń jaldaý sharttaryn qaıta jasaý jumystary 73 paıyzǵa oryndalǵan.
