988 myń adam: elimizde turǵyn úı kezegindegilerdi pátermen qamtý qarqyny qalaı
ASTANA.KAZINFORM — Qazir elimizde baspana kezeginde turǵandardy turǵyn úımen qamtamasyz etý qarqyny qalaı? Bul suraqqa Ónerkásip jáne qurylys mınıstrligi jaýap berdi.
- Búginde el boıynsha turǵyn úı kezeginde 988 myńnan astam adam esepte tur, onyń ishinde 459 myńǵa jýyǵy áleýmettik jaǵynan osal topqa (HÁOT) jatady. Osy jyldyń 8 aıynyń qorytyndysy boıynsha baspana kezeginde turǵan 18 859 otbasy turǵyn úıge ıe boldy, onyń ishinde 12 653-i – jaldamaly turǵyn úı, 6 206-sy – jeńildetilgen ıpotekalyq qaryzdar boıynsha alynǵan baspana, - delingen mınıstrliktiń Kazinform agenttigine bergen jaýabynda.
Sonymen qatar vedomstvo múgedektigi bar adamdardy baspanamen qamtamasyz etý sharalaryna túsinik berdi.
- Turǵyn úı kezeginde turǵandardyń arasynda 66 818-i I jáne II toptaǵy múgedektigi bar adamdar, 28 341-i múgedektigi bar balalardy tárbıelep otyrǵan otbasylar sanatynda tur, - dep atalyp ótken mınıstrlik aqparatynda.
Atalǵan sanattarǵa zańnama normalaryna sáıkes turǵyn úı jaǵdaılaryn jaqsartýǵa baǵyttalǵan memlekettik kelesi qoldaý sharalary kórsetiledi:
- kommýnaldyq turǵyn úı qorynan turǵynjaıdy berý (arendalyq turǵyn úıler);
- jeke turǵyn úı qorynan jalǵa alynǵan turǵynjaı úshin jaldaý aqysynyń bir bóligin sýbsıdııalaý;
- turǵyn úı qurylysy jınaq aqshasy júıesi arqyly 2% jeńildikti ıpotekalyq turǵyn úı qaryzdaryn berý;
- turǵyn úı sertıfıkattaryn berý.
Budan basqa, I jáne II toptaǵy múgedektigi bar adamdar sanatynda arendalyq turǵyn úıdi alǵan azamattar sol baspanany óteýsiz negizde jekeshelendirý quqyǵyna ıe.
Aıta keteıik, buǵan deıin apatty jaǵdaıdaǵy úılerdiń kóbi qaı óńirde ekenin jazǵan edik.
