98 jastaǵy aktrısa Aısha Abdýllına Bishkekte alǵashqylardyń biri bolyp daýys berdi
BІShKEK. QazAqparat - Qyrǵyzstandaǵy Qazaqstan Elshiligindegi №214 saılaý ýchaskesinde QR Prezıdentiniń kezekten tys saılaýynda daýys berý úrdisi ótip jatyr.
Komıssııa músheleri tańerteńnen jumysqa kiristi. Saılaýshylar belsendi túrde jumys istep jatyr. Túske deıin munda 100-den astam adam daýys berdi.
Alǵashqylardyń biri bolyp 98 jastaǵy sahna ardageri jáne aktrısa Aısha Abdýllına daýys berdi. Ol qyrǵyzdyń «Otello» qoıylymynda Dezdemonanyń rólin somdaǵan.
Saılaýǵa alǵash ret qatysqan Rahman Shaharbekke ýchaskelik saılaý komıssııasynyń tóraǵasy, QR Elshiliginiń keńesshisi Erbol Ahmetov shaǵyn syılyq usyndy. R.Shaharbek Almaty oblysynyń grek-rım kúresi boıynsha Qyrǵyzstanǵa oqý-jattyǵýlarǵa qatysý úshin kelgen. Dostarymen jáne ózge de sportshylarmen birge daýyys berdi. «Alǵash ret daýys berip otyrmyn, bul azamattyq paryzym dep esepteımin. Óz halqymdy, elimdi maqtan tutamyn», - dedi ol.
Jambyl oblysynyń turǵyny, eńbek ardageri, «Jeńiske 70 jyl» medaliniń ıegeri 80 jastaǵy Lıdııa Tolmacheva Qyrǵyzstanǵa emdelý úshin kelipti. Saılaý ýchaskesine ony qyzy ákeldi.
«Qazaqstanda turaqtylyq pen azamattyq kelisim el damýynyń kepili», - dedi ol. ShQO týmasy, Vladımır Býrıaktyń otbasy 1997 jyldan beri Qyrǵyzstanda turady. Olar konsýldyq esepke tirkelgen. Saılaý ýchaskesine jubaıy Lıýbov jáne uly Grıgorıımen birge daýys berýge keldi. V.Býrıak daýys berýge únemi otbasymen baratynyn jetkizdi. Eske sala keteıik, QR Elshiliginiń málimetinshe, konsýldyq tirkeýde 270 QR azamaty bar. Saılaý tizimine 300-den astam adam tirkeldi. Saılaý ýchaskesiniń jumysy jergilikti ýaqytpen saǵat 20.00 deıin jalǵasady.
