98 myńnan astam qazaqstandyq jyljymaly keshenderde medıtsınalyq tekserýden ótti
ASTANA. 10 qańtar. QazAqparat - Densaýlyq saqtaýdy damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń aıasyndaǵy mańyzdy baǵyttardyń biri kólik medıtsınalyq damytý bolyp tabylady.
Bul baǵyttaǵy jumystar aýyldyq eldi mekenderdegi shuǵyl medıtsınalyq kómekti, sondaı-aq tótenshe oqıǵalar men jol-kólik oqıǵalary kezindegi medıtsınalyq kómekti jetildirý úshin júrgizilýde, dep habarlady pm.kz saıty.
«Qazaqstan úshin kóliktik medıtsına óte kókeıkesti, sondyqtan biz ony damytatyn bolamyz. Mobıldi medıtsınalyq keshender-avtoklınıkalar sanyn 50 birlikke deıin jetkizý qajet. Olardy shyǵarý Qazaqstanda júzege asyrylýǵa tıis. Úkimetke 2015 jylǵa deıin sanıtarlyq avıatsııa muqtajy úshin keminde 16 tikushaq uıymdastyrýdy qamtamasyz etýdi tapsyramyn», - dep málim etti Elbasy Nursultan Nazarbaev Qazaqstan halqyna «Bolashaqtyń irgesin birge qalamyz!» atty Joldaýynda.
El halqynyń 40 paıyzdan astamy aýyldyq jerlerde turatynyn eskersek, aýyl turǵyndarynyń medıtsınalyq kómekke degen qoljetimdiligin qamtamasyz etý úlken mańyzǵa ıe. Sondyqtan da Qazaqstandaǵy mobıldi medıtsınany damytý aýyl turǵyndarynyń mamandandyrylǵan medıtsınalyq kómek pen skrınıngilik zertteýlerge qoljetimdiligin arttyrýǵa, kórsetiletin medıtsınalyq qyzmetterdiń jedeldigin arttyrýǵa baǵyttalyp otyr.
«El boıynsha azamattar densaýlyq saqtaý qyzmetimen birdeı qamtylýy kerek, onyń ishinde mobıldi medıtsınanyń: tikushaqtyń, avtokóliktiń, temirjoldyń esebinen de», - dep atap kórsetti buǵan deıin Premer-Mınıstr Kárim Másimov.
QR Úkimeti Elbasynyń Joldaýymen mindettelgen kólik medıtsınasyn damytý jónindegi mindetterdi iske asyrýda. Densaýlyq saqtaý mınıstrliginiń aqparaty boıynsha, Sanıtarlyq avıatsııa jónindegi respýblıkalyq úılestirý ortalyǵynyń tikushaqtary 2011 jyldyń 11 aıynda shuǵyl medıtsınalyq kómek kórsetý úshin elimizdiń túrli óńirlerine 300 ret ushqan.
Aýyl-aımaq turǵyndary úshin medıtsınalyq kómekti qoljetimdi etýdiń is-sharalary qolǵa alyndy. Atap aıtsaq, Qazaqstanda 3 emdeý-dıagnostıkalyq poıyz iske qosyldy, poıyzdar 110 stansanyń halqyna 260 myń emdeý-dıagnostıkalyq qyzmet kórsetip, 52 myńnan astam adam, sonyń ishinde 15 myń bala medıtsınalyq qaralýdan ótti.
Zardap shekkenderdiń ómirin saqtap qalatyn qurylǵymen jabdyqtalǵan 6 reanımobıl satyp alyndy, respýblıkalyq mańyzy bar apatty joldarda trassalyq medııtsınalyq-qutqarý pýnktter ashylýǵa daıyn.
Aımaqtarǵa jyljymaly mobıldi keshender satyp alynyp, ornatyldy. Jyljymaly mobıldi keshender arqyly 98 324 myń adam medıtsınalyq qaraýdan ótip, 115 myńǵa jýyq zerthanalyq-dıagnostıkalyq zertteýler júrgizildi, bilikti mamandar 86 myń konsýltatsııa ótkizdi.
«Salamatty Qazaqstan» baǵdarlamasynyń aıasynda mobıldi medıtsına qyzmetimen elimizde jyl saıyn 1,5-2 mln. adam qaralýdan ótetin bolady. Bul shara halyqtyń ortasha ómir jasyn uzartýǵa, aýrýlar men ólim-jitim kórsetkishterin tómendetýde jáne alys aýyldardyń turǵyndary úshin mamandandyrylǵan medıtsınalyq kómekke degen qoljetimdilikti jaqsartýǵa múmkindik beredi.
