9,8 mlrd teńge qysqartyldy: QazAvtoJol eki jol jobasyna qatysty túsinik berdi

«QazAvtoJol» UK» AQ kólik prokýratýrasy málimdegen respýblıkalyq mańyzy bar eki jol jobasy boıynsha jalpy somasy 9,8 mlrd teńgege jýyq shyǵynnyń qysqartylýyna qatysty túsinikteme beredi. Bul — eki bólek joba jáne árqaısysy boıynsha qarajatty qysqartýdyń ózindik sebebi bar.

M-32 «RF shekarasy (Samaraǵa) — Shymkent» avtojolynyń 1153–1240 shaqyrymdaryn ortasha jóndeý qajettiligi 2025 jyly anyqtalǵan. Joldyń jaı-kúıi quqyq qorǵaý organdarynyń ótinishteri men birneshe ret júrgizilgen komıssııalyq tekserýler barysynda tirkeldi.

2025 jylǵy aqpanda joldaǵy aqaýlardy joıý jáne qozǵalys qaýipsizdigin qamtamasyz etý máselesin Qandyaǵash kólik prokýratýrasy kóterdi. Kóktemde bul ýchaskeni jóndeý qajettigin Yrǵyz aýdanynyń polıtsııasy men prokýratýrasy da rastady. 19 mamyrda júrgizilgen komıssııalyq tekserýdiń qorytyndysy boıynsha 1153–1240 shaqyrymdar aralyǵyna ortasha jóndeý qajet dep tanyldy. 2025 jyldyń kúzinde qaıta júrgizilgen tekserý bul sheshimniń negizdi ekenin taǵy da rastady.

Osydan keıin nysan Kólik mınıstrliginiń Avtomobıl joldary komıtetimen maquldanyp, «QazAvtoJoldyń» memlekettik tapsyrmasyna engizildi. Tehnıkalyq qujattama vedomstvolyq saraptamadan ótip, 2026 jylǵy 19 aqpanda Jol aktıvteri sapasynyń ulttyq ortalyǵynan oń qorytyndy aldy.

Satyp alý rásimderiniń qorytyndysy boıynsha 2026 jylǵy 30 naýryzda 87 shaqyrym joldy ortasha jóndeýge 9,803 mlrd teńgege shart jasaldy.

Sonymen qatar 2026 jyly «Ulǵaısyn — Sekseýil» baǵytyn I-b tehnıkalyq sanatqa deıin jetkizýdi kózdeıtin aýqymdy qaıta jańartý jobasy pysyqtala bastady. Ortasha jóndeý týraly shart jasalǵan kezde qaıta jańartý jobasynyń uıymdastyrýshylyq jáne qarjylyq máseleleri áli naqtylaný satysynda bolatyn.

Investıtsııalyq joba boıynsha ekonomıkalyq saraptama 2026 jylǵy 7 shildede alyndy, al kredıttik jeli ashý týraly kelisimge 24 shildede qol qoıyldy. Qaıta jańartý boıynsha qurylys jumystary 2027–2030 jyldarǵa josparlanǵan.

Qaıta jańartý jobasynyń naqty parametrleri aıqyndalǵannan keıin «QazAvtoJol» kólik prokýratýrasymen birlesip, aldaǵy jumys kólemderiniń qaıtalanýyna jol bermeý úshin eki jobany ózara salystyryp, naqtylady.

— Osy kezeńge deıin josparlanǵan 87 shaqyrymnyń 25 shaqyrymy jóndelip úlgergen. Qalǵan bóliktegi jumystardy jalǵastyrý toqtatyldy. Sonyń nátıjesinde shart quny 9,803 mlrd teńgeden 2,710 mlrd teńgege deıin, ıaǵnı 7,093 mlrd teńgege qysqartylady, — delingen habarlamada.

Osylaısha, M-32 avtojolyn ortasha jóndeý joldyń naqty jaǵdaıyna, komıssııalyq tekserýlerdiń qorytyndysyna, memlekettik tapsyrmaǵa jáne saraptamanyń oń qorytyndysyna sáıkes josparlanyp, bastalǵan. Keıin qaıta jańartý jobasynyń naqty parametrleri men qarjylandyrý tetigi aıqyndalǵan soń, ortasha jóndeýdiń qalǵan kólemin oryndaý qajettiligi alynyp tastaldy.

Ekinshi nysan — A-34 «Jetibaı — Jańaózen — Kendirli — Túrikmenstan shekarasy» avtojolynyń 179–229 shaqyrymdaryn kúrdeli jóndeý jobasy boıynsha qarajattyń qysqartylý sebebi basqa.

Jobalaý kezinde nysanǵa jaqyn ornalasqan tehnıkalyq sý kózderi týraly rastalǵan málimet bolmaǵan. Sondyqtan bastapqy qujattamada sýdy tasymaldaýǵa qosymsha shyǵyn qarastyryldy.

— Jobany iske asyrý barysynda tapsyrys berýshi merdiger uıymmen birlesip, bul máseleni qosymsha zerdeledi. Nátıjesinde nysanǵa jaqyn jerden tehnıkalyq sý kózderi anyqtaldy. Tasymaldaý logıstıkasynyń ózgerýi buryn qarastyrylǵan shyǵyndardyń bir bóligin alyp tastap, joba qunyn 2,730 mlrd teńgege tómendetýge múmkindik berdi. Bul jumystyń nátıjeleri Mańǵystaý kólik prokýratýrasyna usynyldy.

Osylaısha, eki joba boıynsha qysqartylatyn qarajattyń jalpy kólemi shamamen 9,8 mlrd teńge. Onyń 7,093 mlrd teńgesi M-32 avtojolynda buryn bastalǵan ortasha jóndeýdi keıingi qaıta jańartý jobasymen úılestirý nátıjesinde alynyp tastalady. Al A-34 avtojoly boıynsha 2,730 mlrd teńge bastapqy derekterdi naqtylaý jáne tehnıkalyq sheshimderdi ońtaılandyrý esebinen qysqartyldy, — delingen QazAvtoJol habarlamasynda.

Aıta ketelik jol jóndeýge 10 mlrd teńge tıimsiz bólingeni anyqtalǵany týraly jazǵan edik.