98 mekteptiń ornyna 20 ǵana: «Jaıly mektepterdiń» qurylysy nege keshigip jatyr
ASTANA. KAZINFORM – «Samruk-Kazyna Construction» aktsıonerlik qoǵamynyń basshysy Máýlen Aımanbetov «Jaıly mektepterdiń» qurylysy nege kesteden keshigip jatqanyn túsindirdi.
Aqpan aıynda Premer-mınıstri Oljas Bektenov 1 qyrkúıekke deıin 98 «jaıly mektepti» qoldanysqa berýdi tapsyrǵan bolatyn. «Samruk-Kazyna» qory qoǵamdyń keńesiniń kezekti otyrysynan keıin jýrnalıster «Jaıly mektep» jobasynyń operatory – «Samruk-Kazyna Construction» aktsıonerlik qoǵamynyń basshysynan osy tapsyrmanyń nege kesteden keshigip jatqanyn surady.
«Bul keshigý emes. Qurylystyń normatıvtik merzimi degen bar.2000 oryndyq mektep 25-28 aıdyń ishinde salynyp bitýi kerek. Úkimettiń jyldam salyp bitirsek degen nıetin túsinemiz, árıne. Biraq sapa degen bar ǵoı. Onyń ózinde de 2000 oryndyq mektepti 18 aıdyń ishinde emes, 11 aıdyń ishinde aıaqtap jatyrmyz. Bul óte jyldam degen sóz. Ákimdikter tek 12000 oryndyq mektepterdi ǵana salady. Biz Binom sııaqty 2000-2500 oryndyq mektepter salyp jatyrmyz. Tańerteń oıanǵanda mektep daıyn turý kerek degen bolmaıdy», - dedi Máýlen Aımanbetov.
