97 jastaǵy keıýana aýrýhanaǵa jumysqa turdy - AQSh
ASTANA. 6 maýsym. QazAqparat - AQSh ekonomıkasyn turalatyn otyrǵan búgingi eń aýyr problemalardyń biri - jumyssyzdyqtyń joǵary deńgeıi.
Degenmen, jumys taýyp baǵy janǵandar da az emes. Solardyń biri - 1,5 jyl boıy jumys izdep, aýrýhanaǵa ornalasqan 97 jastaǵy Merı Pochın, dep habarlaıdy ITAR-TASS agenttigi.
Keıýana Ýorvık qalasyndaǵy (Rod Aılend shtaty) Kent aýrýhanasyna jumysqa turǵan. Onyń mindeti - kelýshiler men patsıentterdi esik aldynda qarsy alý jáne olarǵa qajetti aqparat berý.
«Jyl saıyn men jumys izdeýshilerdiń 1 myńǵa jýyq ótinishin qaraımyn. Biraq Merımen tanysqannan keıin, onyń shyn máninde jumys istegisi keletinin túsindim. Oǵan qosa, onyń adamdardy ózine tarta biletin qasıeti bar», - deıdi aýrýhananyń vıtse-prezıdenti Devıd Kempbell.
Pochın hanym, óziniń eń alǵash ret jumysqa sonaý 1930 jyly daıashy bolyp turǵanyn eske alady. Al onyń sońǵy jumys orny jyljymaıtyn múlikter agenttigi bolypty, ol jerden keıýana 2010 jyldyń qańtar aıynda qysqartylyp shyǵyp qalǵan eken.
