97 jastaǵy ájeı mektep bitirgeni týraly dıplom aldy
ASTANA. QazAqparat - Amerıkalyq Mıchıgan shtatynda turatyn 97 jastaǵy Margaret Bıkem orta bilimi týraly dıplom alǵan kezde kózine jas aldy. Zeınetker 17 jasynda otbasyna járdemdesý úshin mektepti tastaýǵa májbúr bolǵan. 80 jyl boıy áıel dıplom alýdy armandap kelgen. Onyń týystary ájeıdiń tilegin jerge tastamady, dep habarlady, Inquisitr.
Bıkem obyrmen aýyratyn anasy Ketrındi kútip-baǵýy úshin mektepti aıaqtaı almaǵan. Anasy kóz jumǵan soń, jalǵyz ózi úsh inisin ósirý mindetin qolyna alǵan. Ol AQSh áskerinde keńse qyzmetkeri bolyp qyzmet atqardy. Sosyn 17 jyl epsıkopaldyq Greıs shirkeýinde tárbıeshi bolǵan. Al mektepte oqýyn jalǵastyrýǵa ýaqyt tappaǵan.
Jyl basynda zeınetkerdiń aǵasynyń qyzy mektep dırektoryna Bıkemniń armanyn oryndaý maqsatynda ótinish bildirgen. Ákimshilik buǵan qarsy bolmady. Egde áıelge dıplom ózi turatyn qarttar úıinde tabys etildi.
Shara barysynda ol kózine jas aldy.
«Oqýdy, barlyq mekteptegi dostarymdy tastaý maǵan qanshalyqty aýyr bolǵanyn sózben aıtyp jetkize almaımyn», - dedi Margaret. Zeınetkerdiń eri birneshe jyl buryn qaza tapqan. Onyń eki uly, tórt nemeresi, bir shóberesi bar.
Margaret Bıkem eńkeıgen shaqta dıplom alǵan alǵashqy zeınetker emes. 2013 jyly jazda Meksıkanyń 100 jastaǵy zeınetkeri orta bilim týraly dıplom alǵan bolatyn.
