967 ıesiz nysan. Almaty oblysynda memlekettik menshik qalaı qaıtarylyp jatyr

ALMATY OBLYSY. KAZINFORM –  Júrgizilgen taldaý nátıjesinde 304 paıdalanylmaıtyn nysan boıynsha jıyntyq tizim jasalyp, olardy tıimdi paıdalaný joldaryn qarastyratyn Jol kartalary bekitildi. 188 ıesiz nysandy memleket menshigine qaıtarý maqsatynda olardy resmı túrde ıesiz dep taný rásimderi júrgizilip jatyr.

- Ushqonyr sý sharýashylyǵy kolledji. 2016 jyly bul nysan senimgerlik basqarýǵa berilgen bolatyn. Alaıda, ınvestor kelisimshart boıynsha 66,6 mln teńge ınvestıtsııa salý mindettemesin oryndamaǵan. Osyǵan baılanysty sot sheshimimen múlik qaıtadan memlekettik menshikke qaıtaryldy. Esik kóli bógeti jáne 141,6 ga jer ýchaskesi. 2018 jylǵy tenderdiń shartyna sáıkes, ınvestor 1,1 mlrd teńge kóleminde ınvestıtsııa salýǵa tıis bolǵan. Alaıda, bul mindettemeler oryndalmaǵan. 2024 jyly sot sheshimimen nysan memleketke qaıtaryldy. Jalpy somasy 23 mlrd teńgeden astam ınvestıtsııa tartý týraly kelisim jasalyp, bul nysandy keshendi qalpyna keltirý jumystary josparlanǵan, - delingen Almaty oblysynyń ákimdigi taratqan habarlamada.

Nátıjesinde, sý tapshylyǵy máselesi sheshilip, aýyl sharýashylyǵy, jergilikti turǵyndar men týrızm ınfraqurylymyna oń áser etedi dep kútilip otyr.

Qaskeleńdegi Óner mektebiniń eki ǵımaraty. 2015 jyly memleket 134 mln teńgege satyp alǵan bul nysanǵa qatysty kelisimshart 2023 jyly sot sheshimimen jaramsyz dep tanyldy. Apellıatsııalyq shaǵymdaný nátıjesinde ǵımarattar kommýnaldyq menshikke qaıtaryldy.

Almaty ekonomıkalyq kolledji. Alǵashynda onyń damýyna 100 mln teńge ınvestıtsııa qarastyrylǵanymen, keıin bul soma 10 mln teńgege deıin qysqartylǵan. Kelisimshart sharttary múlde oryndalmaǵandyqtan, kolledj memleketke qaıtaryldy.

7 sý sharýashylyǵy nysany. Kelisimsharttyq mindettemelerdiń tıisinshe oryndalmaýyna baılanysty 2024 jyly bul nysandar jergilikti atqarýshy organnyń baqylaýyna ótti.

Memlekettik aktıvterdi tıimdi basqarý jáne ınvestıtsııa tartý maqsatynda kommýnaldyq múlikke aýqymdy túgendeý júrgizildi. Onyń nátıjesinde 967 bos, apatty jáne ıesiz ǵımarat anyqtaldy. Onyń ishinde 427 jeke menshik nysan apatty jaǵdaıda bolyp, turǵyndardyń ómiri men densaýlyǵyna qaýip tóndiretini, sondaı-aq eldi mekenderdiń sáýlettik kelbetine keri áser etetini belgili boldy.

Júrgizilgen taldaý nátıjesinde 304 paıdalanylmaıtyn nysan boıynsha jıyntyq tizim jasalyp, olardy tıimdi paıdalaný joldaryn qarastyratyn Jol kartalary bekitildi. 188 ıesiz nysandy memleket menshigine qaıtarý maqsatynda olardy resmı túrde ıesiz dep taný rásimderi júrgizilip jatyr, - delingen habarlamada.

Qarjy basqarmasynyń málimetinshe, bul ǵımarattardyń bir bóligi buzylyp, keıbiri aýktsıonǵa qoıylady, al qalǵandary qaıta jańǵyrtylady.

Almaty oblystyq qarjy basqarmasynyń basshysy Bıbigúl Uzaqova bul baǵyttaǵy jumystardyń jalǵasatynyn atap ótti. Ol bos turǵan ǵımarattardyń jańartylyp, halyq úshin mańyzdy nysandarǵa aınalýy múmkin ekenin aıtty.

Qazirgi ýaqytta 69 nysan ınvestıtsııalyq jobalardy iske asyrýǵa iriktelip, 5 nysan boıynsha áleýetti seriktesterdi izdeý jóninde konkýrstar bastaldy. Memlekettik múlikti tıimdi basqarý jańa ınvestıtsııalar tartýǵa, jergilikti bıýdjetke qosymsha tabys kózderin qurýǵa jáne jańa jumys oryndaryn ashýǵa múmkindik beredi dep senedi bılik ókilderi.

Ótken jyly Almaty oblysynda jalpy aýdany 397 313 gektar bolatyn 1 340 jer teliminiń paıdalanylmaı otyrǵany anyqtaldy.

Eske salsaq, Almaty oblysynda qaıtarylǵan aktıvter esebinen jańa sport kesheni salynatyny týraly jazǵan bolatynbyz.