96 páter «Nazarbaev Ýnıversıteti» men «Astana Balet» teatrynyń menshigine beriledi
ASTANA. QazAqparat - Astanada memlekettik múlikten «Nazarbaev Ýnıversıteti» DBU-ǵa kóppáterli turǵyn úılerdiń 86 páteri, «Astana Balet» Teatry» JShS menshigine 10 páter beriledi, dep habarlaıdy «QazAqparat» HAA tilshisi.
22 qyrkúıekte QR Premer-mınıstri Baqytjan Saǵyntaev «Respýblıkalyq menshiktiń keıbir máseleleri týraly» №583 Úkimet Qaýlysyna qol qoıdy. Qujatqa sáıkes, respýblıkalyq menshikten «Nazarbaev Ýnıversıteti» DBU-ǵa Astana qalasy, Qabanbaı batyr dańǵyly, 29/1-kóppáterli turǵyn úıdiń 86 páteri qaıtarymsyz beriledi. Mundaǵy bir, eki, úsh jáne tórt bólmeli páterlerdiń aýdany 43,9 sharshy metrden 91,2 sharshy metrge deıin jetedi.
Úkimettiń 25 qyrkúıekte qol qoıylǵan №585 «Respýblıkalyq menshiktiń keıbir máseleleri týraly» basqa qaýlysymen Kenen Ázirbaev kóshesi, 4/1 jáne 8-kóppáterli turǵyn úılerdiń 10 páteri «QR Mádenıet jáne sport mınıstrligi» MM balansynan «Astana Balet» Teatry» JShS jarǵy kapıtalyna ótkiziledi. Bul páterlerdiń barlyǵy bir bólmeli, olardyń aýdany 33,6 sharshy metrden 43,4 sharshy metrge deıin jetedi.
Eki qaýly da qol qoıylǵan kúnnen bastap kúshine engen.
