9,6 mln gektar aýmaq dronmen baqylanady: órtke qarsy iri júıe iske qosyldy
ASTANA. KAZINFORM — OKQ alańynda ótken baspasóz konferentsııasynda órt qaýpsizidigine arnalǵan jıyn ótip jatyr. Brıfıng barysynda QR ETRM Orman sharýashylyǵy jáne janýarlar dúnıesi komıteti tóraǵasynyń m.a. Maqsat Elemesov orman qoryn órtti erte anyqtaý júıesimen qamtý aýmaǵy 1,5 mln gektardan 2,5 mln gektarǵa deıin ulǵaıtylǵanyn aıtty.
Qazirgi tańda júıe «Saıram-Ógem», «Baıanaýyl», «Qarqaraly», «Buırataý», «Іle-Alataýy» jáne «Kólsaı kólderi» ulttyq parkterinde engizilip jatyr. Bıylǵy jyldyń 1 qyrkúıegine deıin bul júıeni Shyǵys Qazaqstan oblysynyń aýmaǵyna keńeıtý josparlanǵan.
— Bıyl ormandardy avıatsııalyq qorǵaýmen qamtý kólemi 8,8 mln gektardan 9,6 mln gektarǵa deıin artty. Oǵan qosa, Batys Qazaqstan jáne Túrkistan oblystarynda, sondaı-aq elorda mańyndaǵy jasyl beldeýde 3 jańa ornalasý núktesi ashyldy. Qazirgi ýaqytta avıatsııalyq núktelerde 18 tikushaq jáne 3 ushaq ornalastyrylǵan.Jalpy órt qaýpi joǵary kezeńde 26 áýe kemesi jumyldyrylady. Onyń ishinde 13 tikushaq keminde 600 lıtr sý syıymdylyǵy bar sý tógetin qurylǵylarmen jabdyqtalǵan, — dedi spıker OKQ alańynda ótken baspasóz konferentsııasynda.
Budan bólek, orman ıelikterinde búgingi kúni 626 ushqyshsyz ushý apparaty bar.
— Ótken jyldarmen salystyrǵanda drondar arqyly patrýldeý sany aıtarlyqtaı artqan jáne olar tolyqtaı jumys rejıminde paıdalanýǵa daıyn, — dedi spıker.
Buǵan deıin órt qaýipi bar maýsymǵa 7 myńnan astam maman jumyldyrylatynyn jazdyq.
