95 jyldyq mereıtoı: Elimizdiń tuńǵysh teatryna «ulttyq» mártebe berildi
ALMATY. QazAqparat – Almatyda M.Áýezov atyndaǵy Qazaq memlekettik drama teatryna 95 jyl tolýyna oraı óner ordasyna «ulttyq» mártebe berildi, dep habarlaıdy QazAqparat tilshisi.
Teatrdyń eń alǵashqy shyǵarmashylyq ujymy Qyzylorda qalasynda 1925 jyly qalyptasty. Al 1926 jyly M.Áýezovtyń «Eńlik-Kebek» pesasymen ashyldy.
1928 jyly el astanasy Almatyǵa aýysqanda teatr ujymy da kóshti. 1937 jyly teatrǵa akademııalyq degen mártebe berilip, 1961 jyly Muhtar Áýezovtyń aty berildi.
Saltanatty sharaǵa QR Mádenıet jáne sport mınıstri Aqtoty Raıymqulova qatysty.
«Kez-kelgen teatrdyń mereıin ústem qylatyn ardagerleri. «Ulttyq» degen mártebe osynda ter tókken birneshe býyn ártisteriniń eńbegi. Qazir teatrǵa jastar kelip jatyr. Olardyń árqaısysy el mádenıetiniń damýyna ólsheýsiz úles qosyp jatyr. Teatr ujymyn 95 jyldyǵymen shyn júrekten quttyqtaımyn. Osy oraıda «Ulttyq» degen mártebe óte úlken syılyq boldy dep oılaımyn», -dedi mınıstr Aqtoty Raıymqulova.
Odan bólek mınıstr 2021 jyly teatr ǵımaratyn qaıta qalpyna keltirý jumystary bastalatynyn aıtty.
«Teatr ǵımaraty óte eski. Biz qazir belgili reseılik sáýletshilermen kelisip qoıdyq», - dedi mınıstr.
«Bizdiń qazaq árdaıym ónerge bas ıgen halyq. Óner ıeleri osy teatrdyń damýyna ólsheýsiz úles qosyp keledi. Men teatrǵa kelgende biz osy teatrdyń 30 jyldyǵyn toılap jatqan edik. Ótkensiz búgin joq demekshi biz óz talantymyz ben tájirıbemizdi keler urpaqqa qaldyratynymyz aıan», - dedi teatrdyń kórkemdik jetekshisi Asanáli Áshimov.
Aıta ketý kerek, QR Prezıdenti Q.Toqaevtyń jarlyǵymen mınıstrlikke qarasty birqatar mádenı uıym ulttyq degen mártebe alǵan bolatyn.
M.Áýezov atyndaǵy Qazaq Ulttyq drama teatry, Qurmanǵazy atyndaǵy Qazaq Ulttyq akademııalyq orkestr, Abaı atyndaǵy Qazaq Akademııalyq Ulttyq Opera jáne balet teatry, M.Lermontov atyndaǵy Orys memlekettik akademııalyq drama teatry, QR Ulttyq kitaphanasy osy mártebege ıe boldy.
Keshke kıeli sahnada «Abaıdyń jumbaǵy» qoıylatyn bolady.
