95 jastaǵy soǵys ardageri baqsha baptap júr - Qyzylorda oblysy
95 jasqa tolǵan maıdangerdiń kóńili sergek, shıraq qımyldaıdy əri anyq sóıleıdi.
«Balalyq, jastyq shaǵymyz alasapyran zamanmen tuspa tus keldi. Əsirese soǵys jyldaryndaǵy aýyr eńbek, jaqyn-jýyqtan aıyrylý ońaı bolǵan joq. Men 1942 jyly maıdanǵa attandym. «Qyryq jyl qyrǵyn bolsa da ajalsyz ólmeıdi» degen. Jaýǵa qarsy soǵystyq, aman qaldyq, biraq jaraqattanyp qaıttyq. Qudaı maǵan ómir berdi, densaýlyq berdi. Sonyń arqasynda erinbeı eńbek ettik. Shúkir! Birneshe shaqyrym jaıaý da júre berem. Úıdiń aldyndaǵy baqshany baptaımyn, jemis aǵashtarynyń artyq butaqtaryn qııamyn. Alma, almurt, qara órik, sary órik ekkenbiz, balalar jeıdi ǵoı jemisin. Solarǵa qarap, ermek qylamyn. Al qazir ótken malǵa kúnde qaraımyn dep aıta almaımyn, balalar ózderi baǵady. Biraq arasynda moıyn buryp, jem shóbin berip turatynym bar», - dedi qarııa.
Aqsaqaldyń qolyndaǵy uly Tóleý men kelini Janardyń aıtýynsha, Qabaq ata kún saıyn merzimdi basylymdardy oqyp, eldiń tynys-tirshiligimen tanysyp otyrady.
«Atamyz tyń. Kózi jaqsy kóredi. Qulaǵy da jaqsy estıdi. Gazetterdiń ər nómirin jibermeı oqıdy. Toǵyz balasynan 21 nemere, 20 shóbere, 1 shópshek súıip otyr», - deıdi Janar.
Aıta keteıik, Qabaq Smaǵulov 1923 jyly týǵan. Ekinshi dúnıejúzilik soǵysyna 1942 jyldyń maýsym aıynda alynyp, Orynbor qalasy mańynda áskerı jattyǵýdan ótedi. Sodan keıin Máskeý baǵytyndaǵy maıdan dalasynda jaýǵa qarsy shyǵady. 1942 jyldyń jeltoqsanynda qolbasshy Rokossovskıı basqarǵan ІІІ ekpindi armııa sapynda Týla qalasyn azat etýge qatysqan. 1943 jyldyń aqpanynda Orel qalasyn jaý qursaýynan bosatý jolynda aýyr jaralanyp, Gorkıı qalasyndaǵy áskerı gospıtalǵa túsedi. 1943 jyldyń qarashasynda medıtsınalyq komıssııanyń uıǵarymymen soǵysqa jaramsyzdyǵyna baılanysty elge oralady.
Soǵys aıaqtalysymen áskerı komıssarıat arqyly Qaraǵandy qalasyn qalpyna keltirý jumysyna aralasady.
Maıdanger Qabaq Smaǵulov Otan qorǵaý jolyndaǵy boryshyn adal ótegeni úshin «Qyzyl juldyz», ІІ dárejeli «Otan soǵysy» ordeni jáne «Erligi úshin», «KSRO Qarýly Kúshterine - 70 jyl», marshal G.K.Jýkov atyndaǵy medaldarmen marapattalǵan.
