95 jastaǵy ardager polıtseı jastarǵa tálim berip júr
Toqsannyń bel ortasyna kelgen sala ardagerin Shyǵys Qazaqstan oblystyq Polıtsııa departamentiniń basshysy Janarbek Baqtybaev pen ishki ister organdary jáne QR Ulttyq ulanynyń Ardagerler keńesiniń tóraǵasy Nurlybek Úderbaev quttyqtap qaıtty.
«Taǵdyry da,ózi de óte erekshe adam». Janarbek Baqtybaev aǵa býyn ókilin jalǵyz aýyz sózben osylaı sıpattaıdy. Maıdanger Qurmat Rahımov Lıtva men Belarýs elin azat etýge atsalysyp, Kenıgsbergti alýǵa qatysty. «Otan soǵysy» ordenimen, «Erligi úshin», «Jaýyngerlik eńbegi úshin», «Kenıgsbergti alǵany úshin», «Germanııany jeńgeni úshin» medaldarymen marapattalǵan. Soǵys aıaqtalǵannan keıin de Qarýly Kúshter qatarynda qyzmet etip, Túrikmenstan-Iran, qazaq-qytaı, sovet-japon, sovet-amerıka shekarasyn kúzetti. 1981 jyly ShQO ishki ister basqarmasy bastyǵynyń orynbasary laýazymynda júrip zeınetke shyqty.
«Oblys ortalyǵynda qyzmette júrgende polkovnık shenine deıin kóterildi. Ásirese, mamandardy irikteýge asqan jaýapkershilikpen qaraıtyn. Quqyq salasynyń qyzmetkerleri barlyq iste minsiz bolý kerektigin qaramaǵyndaǵy saqshylardyń qulaǵyna únemi quıyp otyrdy. Ol ishki ister qyzmetiniń aıaqtan turyp, damýyna qomaqty úles qosty», - deıdi Janarbek Baqtybaev.
Mereıtoı ıesi ǵasyrǵa jýyq jasasa da jigerin joǵaltpaǵan.
«Іshki ister ardagerleri keńesiniń múshesi retinde jastardy tárbıeleýge eleýli úles qosyp júr. Mektep oqýshylarymen, stýdenttermen jıi kezdesip turady. Qatardaǵy saqshylarǵa da tálim berýden jalyqqan emes», - deıdi áriptesi Nurlybek Úderbaev.
