95 adam UBT tapsyrýǵa jiberilmedi – Ulttyq testileý ortalyǵy

NUR-SULTAN. QazAqparat – Tyıym salynǵan zattardy ákelgen 95 adam Ulttyq biryńǵaı test tapsyrýǵa jiberilmedi. Bul týraly QR Ulttyq testileý ortalyǵynyń dırektory Rýslan Emelbaev aıtty, dep habarlaıdy QazAqparat tilshisi.

«Ulttyq biryńǵaı testileýge jiberilmegen jáne nátıjeleri joıylǵan test tapsyrýshylardyń jalpy sany – 95 adam. Onyń ishinde testileýge kirgizý barysynda ártúrli tyıym salynǵan zattardy alyp kelgeni úshin testileýge jiberilmegender – 23 adam. Al test tapsyrý barysynda tyıym salynǵan zattardy qoldanǵany úshin 72 talapkerdiń nátıjesi joıyldy», - dedi ol Bilim mınıstrliginiń apparat jınalysynda.

Onyń dereginshe, pandemııaǵa baılanysty barlyq sanıtarlyq normalar saqtalǵan. Talapkerler 42 test tapsyrý pýnktinde 50 paıyz tolymdylyqpen UBT tapsyryp jatyr.

«Bir ǵana talapker dene qyzýy joǵary bolǵandyqtan testileýge jiberilmedi. Ol basqa ýaqytta tapsyratyn bolady. Múmkindigi shekteýli, erekshe bilim berý qajettiligi bar 29 talapker test tapsyrdy. Bıyl olarǵa qosymsha 40 mınýt ýaqyt jáne arnaýly oryn belgilengen. Test mazmuny da olardyń erekshelikterin eskere otyryp ázirlengen», - dedi Rýslan Emelbaev.