94 myńnan astam pedagog «Ustaz» platformasy arqyly attestattaýdan ótpek
ASTANA. KAZINFORM — 2024–2025 oqý jylynda pedagogterdi attestattaý protsesi alǵash ret «Ustaz» ulttyq platformasy arqyly tolyqtaı tsıfrlyq formatta júrgizilip jatyr. Bul týraly Oqý-aǵartý mınıstrligi málim etti.
— Platformada muǵalimge qatysty málimetter birneshe memlekettik derekqordan avtomatty túrde alynady. Qyzmet orny, eńbek ótili, bilim deńgeıi men jetistikteri bir júıege jınaqtalǵan. Tsıfrlyq format qaǵazbastylyqty joıyp, attestattaýdyń ádil ári ashyq ótýine múmkindik berdi, — delingen vedomstvo habarlamasynda.
Ustazdyń pedagogıkalyq sheberligi týraly derekterdi qadaǵalaýshy mamandar baqylaý paraqtaryn tolyryp, ony pedagogtiń jeke profıline júkteıdi. Ár maman sabaq qorytyndysyn elektrondyq tsıfrlyq qoltańba arqyly rastap, pedagog eńbegine ádil baǵa beredi. Al bilim sapasy, kásibı jetistikter men belsendilik boıynsha derekter ázirge arnaıy modýl arqyly qolmen engizilmek.
Búginde platformada mektepke deıingi, jalpy orta, arnaıy, qosymsha, tehnıkalyq jáne kásiptik bilim berý uıymdarynan 635 myńnan astam pedagog tirkelgen. Olardyń ishinde 94 myńnan astamy «Pedagog-moderator» jáne «Pedagog-sarapshy» sanattary boıynsha júıe arqyly attestatsııadan ótkizilmek.
Búginde 66 myńǵa (71%) jýyq muǵalimniń attestatsııa qorytyndysy shyqty. Aldaǵy ýaqytta ózge de biliktilik sanattary qamtylyp, tsıfrlyq platforma aıasy kezeń-kezeńimen keńeıtiledi.
Buǵan deıin habarlanǵandaı, jańa oqý jylynda 30 myńnan astam pedagog biliktiligin arttyrady.