94 qoıandy zańsyz atqan qyzylordalyq ustaldy

ASTANA. QazAqparat - Qyzylordada júzge jýyq qoıandy zańsyz atqan aýyl turǵyny ustaldy, dep habarlaıdy QazAqparat QR AShM Orman sharýashylyǵy jáne janýarlar dúnıesi komıtetine silteme jasap.

«2019 jyly 25 qańtarda Qyzylorda oblystyq orman sharýashylyǵy jáne janýarlar dúnıesi aýmaqtyq ınspektsııasy jáne «Ohotzooprom» ÓB» RMQK-nyń ınspektorlary birlesken reıdtik sharada Qyzylorda oblysy Qarmaqshy aýdany T. Kómekbaev aýylynyń shyǵysynda zańsyz qoıan atqan S.N. esimdi turǵyndy (1989 j. t.) ustady», - dep habarlady komıtettiń baspasóz hatshysy Sáken Dildahmet.

Onyń «ÝAZ» avtokóliginen 94 qoıan tabylǵan. Qoıannyń 64-i soıylǵan.

«Kúdikti óz kinásin moıyndap, jınaqtalǵan qujattar men aıǵaqtar Qarmaqshy aýdandyq polıtsııa bólimine tapsyryldy. QR Qylmystyq Kodeksiniń 337-babynyń 1-bóligi boıynsha qylmystyq is qozǵaldy», - delingen habarlamada.