93 jastaǵy aqsaqal qajylyqqa dep jınaǵan aqshasyn múgedek balalarǵa úlestirip berdi
PAVLODAR. KAZINFORM – Pavlodardaǵy qarttar úıinde turatyn Saǵadat Jumabaev qajylyqqa dep jınap kelgen 3,6 mln teńge qarajatyn múgedek balalarǵa berdi. Aqsaqaldyń jasy búginde 93-ten asqan.
Jalpy somasy 3,6 mln teńge qarajatty qarııa on jyl boıy jınap kelipti. Keıingi ýaqytta densaýlyǵy jıi syr berýine ári jasynyń úlkendigine baılanysty uzaq sapardan bas tartýyna týra kelgen. Aıtýynsha, ózi – tyl ardageri. Kolhozda jumys istep, Ekinshi dúnıejúzilik soǵys jyldary jaýdy jeńý úshin aıanbaı eńbek etken.
– Mekkege baramyn dep uzaq jyldar zeınetaqymnan jyryp aqsha jınadym. 2022 jyly shetelge shyǵý úshin tólqujat aldym. Ókinishke qaraı, sol jyly qajylyqqa baratyndardyń jasy 65-ten aspaýy kerek degen talap qoıylyp, meni týroperatorlar almady. Odan soń densaýlyǵym syr berip, júrip-turýym aýyrlaı bastaǵanyn sezdim. Onyń ústine tanys adamdar ol jaqqa barý úshin janyma adam ertip júrýim kerektigin aıtty. Aqyr-sońy qasıetti sapardan bas tartýyma týra keldi, - deıdi Saǵadat ata.
Otasqan jarymen uzaq jyl tútin tútetken. Alaıda taǵdyrdyń jazýymen aralarynda bala bolmaǵan. 2009 jyly zaıyby qaıtys bolǵan soń jalǵyz qalady. Іnisi 69 jasynda ómirden ozǵan. Al anasy 98 jasynda dúnıe salypty. Sondyqtan óziniń uzaq ómir súrýiniń syryn anasynyń teginen daryǵan dep esepteıdi.
– Keıingi ýaqytta sheshem túsime jıi kiredi. Ananyń orny ystyq eken, ony únemi saǵynamyn. Oılana kele, kóp jyl boıy jınaǵan qarajatymdy múgedek bala asyrap otyrǵan otbasylarǵa berýdi uıǵardym. Joldastarymnan surastyra júrip dertke shaldyqqan balalardy taýyp, olardy anasymen birge bir jerge jınadyq. Tirnektep jıǵan 3,6 mln teńgemdi 120 myń teńgeden bólip, 30 balanyń anasyna ustattym. «Qalqalarym, bul – tún uıqysyn tórt tólip, balasynyń ómiri úshin kúresken analar eńbeginiń óteýi dep túsinińder» dep atap aıttym. Ananyń aıaly alaqanyn, onyń óz perzentin ósirip-jetkizýdegi eńbegin dúnıede esh nársemen ólsheı almaısyń, - dep tolǵandy tyl ardageri.
Aqsaqal bıyl Jeńistiń 80 jylynda tyl ardageri retinde birjolǵy bıýdjettik tólemdi ala almaǵanyn aıtady. Turyp jatqan qarttar úıiniń basshylyǵynan suraǵanda «Sizder onsyz da memlekettiń qamqorlyǵynda otyrsyzdar, ondaı tólem qarastyrylmaǵan» dep jaýap beripti. Qarııa Jeńiske úles qosqan qarttardy alalaý durys emes dep sanaıdy. Sondyqtan bul sheshimge óziniń qamkóńil bolyp qalǵanyn jetkizdi.
– Al qarttar úıindegi jalpy jaǵdaı kóńilimizden shyǵady. Qaryn toq, kóılek kók. Jalǵyz ózim bir bólmede turyp jatyrmyn. Qyzmetkerlerdiń barlyǵy meıirban, qamqorlyqpen qaraıdy, - deıdi ol.
Saǵadat ata qazirgi Tereńkól aýdanynda shóp shabýshy, kolhoz esepshisi, brıgadır, kirpish zaýytynyń sheberi, qoıma meńgerýshisi qyzmetterin atqarǵan. Keıin Pavlodarǵa kóship kelip, zeınetke shyqqanǵa deıin alıýmınıı jáne traktor zaýyttarynda eńbek etken. 1988 jyldan beri zeınette.
Buǵan deıin soǵys tehnıkasyna aqshalaı kómek bergen baıanaýyldyq qarııa týraly jazǵanbyz.