92 mln teńgelik penthaýs: Shymkentte UQK-niń burynǵy basshysynyń orynbasaryna qatysty is qorytyndy satyǵa jetti

ShYMKENT. KAZINFORM — Búgin qylmystyq ister jónindegi mamandandyrylǵan aýdanaralyq sotta alqabıler soty bıylǵy jyldyń eń rezonansty sybaılas jemqorlyq isteriniń biri boıynsha taraptardyń jaryssózin bastady.

UQK oblystyq departamenti basshysynyń burynǵy orynbasary Manat Sarbasovqa asa iri kólemdegi alaıaqtyq jasady, para berýge jáne alýǵa ıtermeledi, zańsyz tabysty zańdastyrdy degen aıyp taǵylyp otyr. 

Tergeý nusqasyna sáıkes, ol 2020 jyly pandemııa kezinde medıtsınalyq jabdyqtar men qorǵanys quraldaryn satyp alý shemasyna aralasqan. Memleket bólgen qarjynyń bir bóligi jyljymaıtyn múlikke jumsalǵan degen kúdik bar.

Sot otyrystary barysynda aıyptalýshy men onyń jaqyndarynyń múliktik operatsııalaryn taldaýǵa erekshe kóńil bólindi. Sotqa 2020 jyly Qonaev dańǵylyndaǵy turǵyn úı kesheninen 34 mıllıon teńgege eki deńgeıli páter satyp alynǵany jóninde dálelder usynyldy. Tergeý dereginshe, bul jyljymaıtyn múlik Sarbasovtyń jubaıynyń ápkesi — Botagóz Myrzabaevanyń atyna rásimdelgen.

Araǵa eki jarym jyl salyp, páter 92 mıllıon teńgege satylyp, qarajat sol týysynyń depozıttik shotyna aýdarylǵan.

Sot otyrysynyń birinshi jartysynda kýálardan jaýap alý barysynda negizgi nazar penthaýsqa aýdaryldy. Kýá retinde sóz alǵan Botagóz Myrzabaeva atalǵan páterdiń rasynda otbasyna tıesili bolǵanyn rastady.

— Manat Sarbasovtyń bul páterge eshqandaı qatysy bolǵan joq. Penthaýsta biraz ýaqyt boıy ápkesi «otbasylyq jaǵdaılarǵa baılanysty» turǵan, keıinirek kóship ketken, — dep túsindirdi kýáger.

Botagóz páterdi óz betinshe, onyń qamaýǵa alynǵanynan beıhabar kúıde satqanyn jáne barlyq aqshany shotynan sheship alǵanyn málimdedi. Ol sonymen birge birde-bir teńgeni Sarbasovqa bermegenin aıtty. Úıinde tintý júrgizý barysynda uıaly telefony tárkilengenimen, kýáger óz quqyqtary jóninde tıisti túrde habardar etilmeı turyp, qupııasózdi erikti túrde bergenin jetkizdi.

Botagózdiń jubaıy, kásipker Dıdarbek Narshabekov Sarbasovpen de, sondaı-aq memlekettik satyp alý bóliminiń burynǵy basshysy Chıngız Djanabaevpen de tanys ekenin aıtty. Narshabekovtiń sózinshe, birde Sarbasov ózinen 10 mıllıon teńge qaryzǵa surap, keıin 13 mıllıon etip qaıtarǵan. Sondaı-aq ol Qonaev dańǵylyndaǵy penthaýstyń qarapaıym árleýde 34 mıllıon teńgege satyp alynǵanyn, jóndeýden ótip, 92 mıllıon teńgege satylǵanyn rastady.

— Túsken qarajatqa jer telimin alýdy josparlaǵanmyn, biraq ol júzege aspady, — dedi kásipker.

Manat Sarbasovtyń jubaıy Dınara Myrzabaevanyń jyljymaıtyn múlik operatsııalaryna qatysqanyn rıeltor Anton Romanov rastady. Ol birneshe páterdi jalǵa berý jóninde, sonyń ishinde penthaýsty aıyna 600 myń teńgege jalǵa usyný týraly odan ótinishter alǵanyn atap ótti. Alaıda, onyń aıtýynsha, barlyq jaıtty egjeı-tegjeıli eske túsirý qıyn, sebebi arada birneshe jyl ótken.

Penthaýstyń jańa ıesi sot otyrysyna onlaın qosylyp, páterdi 2022 jyly bank arqyly nesıege satyp alǵanyn túsindirdi. Onyń aıtýynsha, turǵyn úıdi satý týraly habarlandyrý saıtqa jarııalanǵan, kelissózderdi Dınara júrgizgen, al mámile rásimdeý kezinde jyljymaıtyn múlik Botagózdiń atyna rásimdelgendikten, ol da qatysqan. Sondaı-aq ol Sarbasovty jeke tanymaıtynyn atap ótti.

Qosymsha málimetti turǵyn úı kesheniniń santehnıgi berdi. Ol úsh páterdegi jóndeý jumystaryna berilgen barlyq tapsyrystar Dınara Myrzabaevadan túskenin rastady. Onyń sózine qaraǵanda, Dınara bul jyljymaıtyn múlikti qaıyn atasy — Sarbasovtyń ákesi satyp alǵanyn aıtqan.

Aıta ketý kerek, sot jýrnalısterge zalda foto jáne beınetúsirilim júrgizýge tyıym saldy. Bul shekteý aıyptalýshyǵa, qorǵaýshyǵa, prokýrorǵa, alqabıler men kýálarǵa da qatysty boldy. Sot tyńdalymy sýdıa Ábinur Qarabaevtyń tóraǵalyǵymen ótip jatyr, al memlekettiń múddesin basqarma prokýrory Mádııar Ábilqasymov qorǵaýda.

Bul istiń tyńdalymdaryna shamamen jarty jyl ýaqyt boldy. Kýálardan jaýap alý, ondaǵan adamnyń málimdemeleri men qarjylyq jáne múliktik qujattardy taldaýdan keıin sot qorytyndy kezeńge — taraptardyń jaryssózine ótti. Aldaǵy kúnderi qorǵaýshy men aıyptaýshy ózderiniń sońǵy ýájderin usynady, sodan keıin alqabıler úkim shyǵarý úshin keńeske ketedi.

Aıta keteıik, budan buryn Shymkentte psıhotroptyq zat daıyndaýǵa áreket jasaǵan adam 8 jylǵa sottalǵanyn jazǵan bolatynbyz.