9,2 myń agressorǵa erekshe talap qoıyldy — ІІM
ASTANA. KAZINFORM — Jyl basynan beri áıelderge qatysty quqyq buzýshylyq jasaǵan azamattarǵa 35 myńnan astam qorǵaý nusqamasy shyǵarylyp, 9,2 myń agressorǵa qatysty erekshe talap belgilendi. Bul týraly Іshki ister mınıstriniń orynbasary Sanjar Ádilov málim etti.
Onyń málimetinshe, jyl basynan beri áıelderge qatysty quqyq buzýshylyq jasaǵan 41 myńnan astam adam ákimshilik jaýapkershilikke tartylǵan.
— 11 myńnan astam adam ákimshilik qamaýǵa alyndy. Sonymen qatar 35 myńnan astam qorǵaý nusqamasy shyǵaryldy. Sot sheshimimen 9,2 myń agressorǵa qatysty erekshe talaptar belgilengen. Onyń ishinde 8,3 myń adamǵa alkogoldik ishimdik tutynýǵa tyıym salyndy, — dedi Sanjar Ádilov.
Vıtse-mınıstrdiń aıtýynsha, belgilengen shekteýlerdi buzǵany úshin 10 myńnan astam adam jaýapqa tartylǵan. Sot sheshimimen olardyń barlyǵyna mindetti psıhokorrektsııalyq baǵdarlamalar taǵaıyndalǵan.
— Árbir áıel ózin qaýipsiz sezinýi tıis. Memleket basshysynyń tapsyrmasyna sáıkes, áıelderdiń quqyqtaryn qorǵaý jáne olarǵa qatysty quqyq buzýshylyqtardyń aldyn alý jumysy turaqty baqylaýda, — dedi ІІM ókili.
Aıta keteıik, Іshki ister mınıstrligi elimizde bopsalaý qylmysy 15%-ǵa azaıǵanyn aıtqan edi.
