90 jyl buryn Túrksib temirjolynyń qurylysy aıaqtaldy
Almatydan ońtústik jaǵynan Semeıden soltústik jaǵynan kelip jetken Túrkistan – Sibir temirjolynyń sońǵy relsin qalaý saltanatty jaǵdaıda ótti. Qurylystyń sońǵy shegesi josparlanǵan merzimnen 8 aı erte qaǵyldy.
«Mine sońǵy rels juby berildi. Qasym-qaǵym sát jáne sońǵy ret qaǵyldy! Bitti! Túıisý aıaqtaldy. Soltústik pen ońtústiktiń júzdegen rels tóseýshi jumysshysy bir birlerine bettedi. Bári urandatty. Bul umytylmas sát edi. Adamdar bir birin quttyqtap, qaýyshyp jatty», - dep jazdy «Gýdok» temirjol gazeti.
«Búginde aty ańyzǵa aınalǵan Túrksibti qysqa merzim ishinde tehnıkasyz tek adam kúshimen ǵana salyp shyǵýy keremet sııaqty bolyp kórinedi. Bul taýlar men ózender, shólder men betpaq dala arqyly 1,4 myń shaqyrymnan astam relsti jol. Temirjoldy Uly Jibek jolynyń jalǵasy dep sanaýǵa bolady. Onyń boıynda jańa depolar, kópirler salynyp, baılanys júıesi jolǵa qoıyldy. Qazir óskeleń urpaq Túrksibtiń tarıhyn, ony salǵandardyń erligin bilýi tıis. Bul Gınnester kitabyna laıyq rekord. Túrksib qurylysshylarynyń dástúrin qazirgi jastar jalǵastyrýy kerek» - deıdi «QTJ» UK» AQ Konsýltatıvtik keńesiniń múshesi, qurmetti temirjolshy Qaltaı Sámbetov.
Sol kezde jol salýǵa kelgen myńdaǵan adam saýatyn ashyp, jolshylar, mashınıster, mehanıkter, baılanysshylar tehnıka mamandyǵyna ıe boldy.
Kóbisi temirjolshylar áýletin bastaýynda tur. Jańa jolmen Ortalyq Azııa elderine kómir, aǵash, metall jáne astyq tasyldy, keri qaraı– maqta men jún artylǵan poıyzdar júre bastady. Temir jol aýyl sharýashylyǵy, taý-ken óndirisi, metallýrgııa, munaı óndirisi jáne ózge de salalar úshin jańa múmkindik ashyp, aımaqtyń damýy úshin qýatty serpin berdi. Jyl saıyn Túrksibte tasymal kólemi aıtarlyqtaı artty. Shóldi jáne shóleıtti jerlerde jańa stansalar men qalalar paıda boldy. Olardyń qatarynda Jańa Semeı, Shar, Jalǵyztóbe, Jarma, Aıagóz jáne ózgeleri bar.
Qazaqstan temir joly kompanııasy Túrksib mereıtoıyna arnap ár túrli is–sharalardy ótkizýdi josparlap otyr. Olardyń kópshiligi onlaın, qashyqtyqtan ótkiziledi. Kelesi urpaq temir jol tarıhyn esten shyǵarmaýy jáne qurmetteýi mańyzdy.
