90 jyldyq mereıtoı: Almaty qýyrshaq teatrynda 1500 qoıylym qoıylady

ALMATY. KAZINFORM – 2024 jyly Almatydaǵy qýyrshaq teatryna kelgen kórermender sany eki ese artty. 

Almaty qalasynyń memlekettik qýyrshaq teatrynyń dırektory Almat Amangeldiniń aıtýynsha, byltyr óner ordasy 1 390 qoıylym usynǵan jáne ony 92 myń kórermen tamashalaǵan. Sondaı-aq ótken jyly teatr qyzmetkerleriniń jalaqysy 30%-ǵa ósken. Al 16 maman Kanada, Reseı jáne Qyrǵyzstannyń jetekshi teatr mektepterinde biliktiligin arttyrdy.

- Bul sońǵy jyldardaǵy eń joǵary kórsetkish boldy. Bıletterden túsken tabys ta tarıhı deńgeıge jetip, 80,8 mln teńge boldy. Qazaqstannyń qýyrshaq teatry dástúrlerdi saqtap qana qoımaı, ınnovatsııalar engizip, repertýaryn keńeıtip, halyqaralyq deńgeıge de shyǵyp jatyr, – dep atap ótti Almat Amangeldi.

Bıyl memlekettik qýyrshaq teatry 90 jyldyq mereıtoıyn aýqymdy baǵdarlama boıynsha atap ótpek. Kórermenderge jańa qoıylymdar, «Almaty Puppet Festival» úshinshi halyqaralyq festıvali, sondaı-aq teatr murajaıynyń ashylýy jáne tarıhı kitaptyń shyǵýy usynylady. Sonymen qatar teatr spektaklder sanyn arttyryp, bir jylda 1500 qoıylym qoıýdy jáne aýdıtorııany 95 myń kórermenge deıin ulǵaıtýdy josparlap otyr.

Teatr bıyl tórt premerany usynady:

- «Orman ǵajaıyptary» - shytyrman oqıǵalarǵa toly ertegi.
- «Naýryz qupııasy» – halyq dástúrine negizdelgen spektakl.
– «Meniń atym Qoja» - Berdibek Soqpaqbaevtyń áıgili shyǵarmasyn sahnalaý.
– «Orteke» - qýyrshaq óneriniń shyǵý tegi týraly baıandaıtyn biregeı qoıylym.

Eske salaıyq, buǵan deıin Almaty qýyrshaq teatry birneshe halyqaralyq festıvalde júldeli bolǵanyn jazǵanbyz.