90 myńnan astam elordalyq ekologııalyq senbilikke qatysady
ASTANA. QazAqparat - Elordada 13 sáýirden 13 mamyrǵa deıin sanıtarlyq tazartý, abattandyrý jáne Astana qalasynyń aýmaǵyn kógaldandyrý boıynsha kóktemgi ekologııalyq aılyq ótedi. Al «Biz taza qalany qoldaımyz!» jalpyqalalyq senbiligi 18 sáýirde ótedi, dep habarlaıdy astana.kz.
Astana qalasy Tabıǵı resýrstar jáne tabıǵat paıdalanýdy retteý basqarmasynyń habarlaýynsha, ekologııalyq aılyq aıasynda qala aýmaǵyn sanıtarlyq tazartý, kóshelerdi, jaıaý júrginshi joldaryn, oramishilik aýmaqty tazalaý, sel jáne aryq kanalızatsııalaryn tazartý; saıabaqtar men gúlzarlardaǵy jasyl kóshetterdi kútý boıynsha maýsymdyq agrotehnıkalyq jumystar júrgizý, kógaldar men gúlzarlardy ornalastyrý sharalaryn júrgizý, ruqsat etilmegen qoqys tastaý oryndary men las jerlerdi joıý josparlanyp otyr. 18 sáýir kúni ótetin jalpyqalalyq senbilikke 5 myń kásiporyn men uıym, 45 joǵary jáne orta mamandandyrylǵan oqý orny, 124 mektepke deıingi jáne jalpy bilim berý mekemesi, 58 densaýlyq saqtaý mekemesi, 161 memlekettik mekeme, vedomstvo jáne ulttyq kompanııalarynan shamamen 92 myń adam qatysady, 460-qa jýyq tehnıka jumyldyrylmaq. Senbilikke qatysýshylar qajetti quraldarmen (kúrek, tyrma), qolǵap jáne qoqys jınaýǵa arnalǵan qaptarmen qamtamasyz etiledi.
Sonymen birge qalada 2 316 kóshet otyrǵyzý josparlanǵan. Atap aıtqanda, «Almaty» aýdanynda 1 111 aǵash otyrǵyzylady (№46 kósheniń boıynda 611 kóshet, Esil ózeni boıyndaǵy (oń jaǵalaý) saıabaqta 500 kóshet). Sondaı-aq «Esil» aýdanyndaǵy Ilınka turǵyn alabyndaǵy áskerı qalashyqta 224 kóshet jáne «Han Shatyr» SOO aınalasynda 750 kóshet otyrǵyzylady. Al «Saryarqa» aýdanynda 231 aǵash (Tilendıev dańǵylynyń boıynda) boı túzemek. Sonymen qatar stýdentter men áskerı bólimshelerdiń áskerı qyzmetkerlerin tarta otyryp, Esil, Aqbulaq jáne Sarybulaq ózenderiniń arnasyn qoqys pen turmystyq qaldyqtardan tazartý boıynsha ekologııalyq aktsııalar ótkizilmek.
