90 myń teńge aılyq alamyz - Sharyn shatqalynyń ınspektory
Memlekettik ınspektor Qazbek Qoıshybaev park qurylǵaly qyzmet etip keledi.
Aıtýynsha qazir qaraquıryq sany edáýir ósken. Basqa da ań-qustyń kóbeıgenin kózben kórip keledi. Qorshaǵan ortany qorǵaý úshin kúndiz-tún at ústinde júredi. Baqylaıdy. Jumysy ózine unaıdy. Alaıda bir áttegen-aıy jalaqysy tómen.
«Biz myna jumysty bastaǵan kezde aılyǵymyz 7 myń teńge boldy. Qazir 80-90 myń teńge alamyz, bul az. Bizdiki qalypty jumys emes, kún-túni júresiń», - dedi memlekettik ınspektor Qazbek Qoıshybaev.
Sharyn shatqalynyń aýmaǵy 127 myń gektardan asady. Ulttyq park bolyp qurylǵaly erekshe qorǵalady. Sharyn shatqalynyń taǵy bir baılyǵy janýarlar dúnıesi. Sútqorektilerdiń 30-dan astam túri bar. Baýyrymen jorǵalaýshylardyń 18 túri, qosmekendilerdiń 4 túri jáne 100-den asa qus túri mekendeıdi. Olardyń joıylyp ketpeýine jáne brakonerlerdiń nysanasyna aınalmaýyna 20 memlekettik ınspektor jaýapty. Foto jáne beıne tuzaqtar qoıylǵaly park aýmaǵynda ózge de tirshilik ıeleriniń bar ekeni dáleldendi.
Sharyn shatqalynda týrızmdi damytýdyń keshendi jospary qurylǵan. Qazirgi tańda arnaıy qaýly qabyldanyp, shatqaldyń ınfraqurylymyn qolǵa alatyn ınvestorlar qarastyrylýda.
«Týrıstik soqpaqtardy jáne de týrıstik oryndardy jaqsartý maqsatynda ulttyq tabıǵı parkte 2 vızıt ortalyǵy, bir glempıng, bir kempıng, zıplaın atraktsıony jáne de balalar oınaıtyn alańdar, sonymen qatar qonaq úı, eki qonaq úı jánede meıramhanalar jasalýǵa negizdelgen joba jasalyndy. Qazirgi ýaqytta tenderge qatysatyn ınvestorlarmen kelissóz júrgizilýde jáne qoǵamdyq keńes talqysyna da usynamyz», - dedi «Sharyn shatqaly» memlekettik ulttyq tabıǵı parkiniń dırektory Elnur Ahmetov.
75 jastaǵy almatylyq Sáýle apa shatqalǵa nemerelerin ertip kelipti. Maqsaty osy jaqut mekendi kórsetý. Osy ýaqytqa deıin talaı eldi aralap kórip qaıtqan zeınetker mundaı keremet jer esh qaıda joq deıdi.
«Japonııada boldym. Varna, Bolgarııada, Túrkııada boldym. Atyraýda boldym. Mynandaı jer esh bir memlekette joq. Osynyń bárin balalarǵa kórsetý kerek. Oqytý kerek. Bizge saqtaý kerek. Sharyn shatqalyndaǵy taýlarǵa qarap otyryp aq demalasyń, sondaı ádemi. Músinderi de erekshe»,- deıdi Almaty qalasynyń turǵyny Sáýle Jantýarova.
