90 myńǵa jýyq adam áleýmettik jelide Jalpyulttyq koalıtsııa bastamasyn qoldady

ASTANA. KAZINFORM – Jalpyulttyq koalıtsııa aıasynda áleýmettik jelilerde paıdalanýshylardyń avatarlaryna taqyryptyq ramka ornatý bastamasy júzege asyrylýda. 15 naýryzǵa belgilengen jalpyulttyq referendým qarsańynda óz azamattyq ustanymyn jarııa túrde bildirgen 88 myńnan astam adam aktsııaǵa qosyldy.

Twibbonize.com ashyq platformasynda arnaıy «referendum2026» tvıbbony júkteldi. Birneshe kún ishinde ol ósý qarqyny boıynsha TOP-1 qataryna enip, servıstegi eń kóp qoldanylǵan tvıbbonǵa aınaldy.

Qazirgi ýaqytta bastamany qoldaýshylar sany 88 myń adamǵa jetti. Uıymdastyrýshylardyń málimetinshe, jańa Konstıtýtsııa jobasyn qoldaıtyn azamattar sany kún saıyn artyp keledi.

Onlaın-belsendilikke birqatar tanymal qazaqstandyqtar da qosyldy. Atap aıtqanda, blıts-shahmattan álem chempıony Bıbisara Asaýbaeva, Sıdneı Olımpıadasynyń júldegeri Muhtarhan Dildábekov, bokstan Qazaqstannyń úsh dúrkin chempıony Vasılıı Levıt, eńbek sińirgen óner qaıratkeri Qarakóz Súleımenova, mýzykant Abaı Begeı, prodıýser Renat Basıt, «Dervıshı» tobynyń solısi Dilmurat Baharov, halyq ártisi Tuńǵyshbaı Jamanqulov jáne akter Erbolat Tólegen bar.

Bastama Qazaqstannyń ár óńirindegi paıdalanýshylardy biriktirip, azamattardyń el bolashaǵyn talqylaýǵa qatysýynyń joǵary deńgeıin kórsetti.

Uıymdastyrýshylardyń pikirinshe, bul aktsııa qoǵamdaǵy tsıfrlyq belsendiliktiń jańa formatyna aınalyp otyr.

Aıta keteıik, TMD saılaý organdary basshylarynyń otyrysynda referendým men JI máseleleri talqylandy.