90 myń adamnan 25 mlrd teńge jınaǵan qarjy pıramıdasynyń uıymdastyrýshylary sottaldy
ASTANA. KAZINFORM — Almatyda Asar Baspana qarjy pıramıdasyn uıymdastyrǵandarǵa qatysty sot úkimi shyqty. Tergeý barysynda kompanııanyń 90 myńǵa jýyq azamattan jalpy 25 mlrd teńge jınaǵany anyqtaldy.
Qarjylyq monıtorıng agenttiginiń habarlaýynsha, uıymdastyrýshylar salymshylarǵa aı saıyn 30 paıyzǵa deıin tabys túsetinin ýáde etken. Sonymen qatar qurylys materıaldary, tigin ónimderi, turmystyq jáne medıtsınalyq tehnıka shyǵaratyn zaýyttar jumys istep turǵany týraly jalǵan aqparat taratqan.
Alaıda is júzinde atalǵan ónimder basqa jetkizýshilerden satyp alynyp, Asar Baspana logotıpimen tańbalanǵan.
2024 jylǵy jeltoqsanda pıramıdaǵa degen senim azaıa bastaǵan kezde uıymdastyrýshylar avtomagazınder ashylyp, dılerlermen kelisim jasalǵany týraly taǵy da jalǵan málimet taratqan. Sot materıaldaryna sáıkes, kólikter salymshylardyń aqshasyna satyp alynyp, týystarynyń atyna rásimdelgen.
— Sot úkimimen Týǵanbaev N.M. 8 jylǵa bas bostandyǵynan aıyryldy. Taǵy úsh uıymdastyrýshy 7 jylǵa sottaldy. Al úsh óńirlik jetekshige 5 jylǵa shartty jaza taǵaıyndaldy, — delingen habarlamada.
Sonymen qatar jalpy quny 5,6 mlrd teńge bolatyn buǵattalǵan aktıvter jábirlenýshilerdiń shyǵynyn óteýge jumsalady. Qalǵan múlik memleket kirisine ótkiziledi.
Sot úkimi ázirge zańdy kúshine engen joq.
Eske salaıyq, buǵan deıin Almatyda 25 mıllıard teńge tartqan qarjy pıramıdasynyń basshysy sottalǵanyn habarlaǵan edik.
