90 kúnnen asqan bereshegi barlarǵa kepilsiz tutynýshylyq nesıe berýge tyıym salynady – Zań
ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý, qaryz alýshylardyń quqyqtaryn qorǵaý, qarjy naryǵyn retteýdi jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» Zańǵa qol qoıdy. Bul týraly Aqordanyń baspasóz qyzmeti málim etti.
Zańǵa halyqtyń boryshtyq júktemesiniń ósýine jol bermeýge qatysty birqatar erejeler engizildi.
Azamattar boryshynyń ósýin boldyrmaý úshin merzimi ótkenine 90 kúnnen asqan bereshegi bar tulǵalarǵa kepilsiz tutynýshylyq qaryzdar berýge tyıym salynady. Alaıda qaryzdy qaıta qarjylandyrýǵa bul tyıym júrmeıdi.
«Áskerı qyzmetshiler merzimdi áskerı qyzmetin ótkerý kezinde jáne demobılızatsııadan keıin 60 kún ishinde alǵan qaryzyna syıaqy esepteýden bosatylady», -delingen habarlamada.
Sonymen qatar 2026 jylǵy 1 mamyrǵa deıin bankter men mıkroqarjy uıymdaryna azamattardyń qaryzyn kollektorlyq agenttikterge berýge tyıym salyndy. 2026 jylǵy 1 mamyrdan bastap kollektorlyq agenttikterge jeke tulǵalardyń quqyqtaryn (talaptardy) berý sharttary qatańdataldy. Dál osy kúnnen bastap tek bereshek týyndaǵan sátten 24 aı ótken jáne bereshekti retteý jónindegi rásimder mindetti túrde júrgizilgen jaǵdaıda ǵana qaryz alýshy jeke tulǵalarǵa qatysty quqyqtardy (talaptardy) kollektorlarǵa berýge bolady.
«Bank ombýdsmanynyń barlyq banktik qaryz sharttary boıynsha daýlardy qaraý quzyreti keńeıtildi (buǵan deıin ol tek ıpotekalyq sharttarǵa qatysty daýlardy qaraıtyn) jáne mıkroqarjy ombýdsmany ınstıtýty engizildi. Jeke tulǵalar ombýdsmandardyń sheshimimen kelisken jaǵdaıda, mundaı sheshimderdi qarjy uıymdary oryndaýǵa mindetti», — dep habarlady Aqordanyń baspasóz qyzmeti.
Ombýdsmandar halyqtyń áleýmettik osal toptaryna jatatyn boryshker jeke tulǵalardyń ótinishterin qaraǵan kezde kepilge alynǵan jyljymaıtyn múlikti óndirip alýǵa tyıym salynady. Sondaı-aq osy sanatqa jatatyn azamattar buǵan deıin mindettemeni oryndamaǵanyna baılanysty bank balansyna ótip ketken jaldamaly baspanasyn satyp alýǵa quqyly.
Kámeletke tolmaǵan balalary bar otbasylardy jáne 1 nemese 2 toptaǵy múgedektigi bar adamdardy jylytý maýsymynda jalǵyz baspanasynan májbúrlep shyǵarýǵa tyıym salynady.
Óndirip alýǵa jatpaıtyn jáne bereshekti májbúrlep óndirip alý sharalaryn qabyldaǵan kezde qaryz alýshynyń banktik shotynda qalýǵa tıis aqsha somasy eń tómengi kúnkóris deńgeıiniń (43407 teńge) eki eselengen mólsherine (86814 teńge) deıin ulǵaıtyldy.
20 AEK-ke (73840 teńge) deıingi ákimshilik aıyppuldardy jáne salyq bereshegin óndirip alý kezinde ońaılatylǵan is júrgizý tártibi engizildi. Іsti ádilet organdary avtomattandyrylǵan aqparattyq júıesi arqyly júrgizedi. Bul azamattardy jeke sot oryndaýshylarynyń qyzmetterine aqy tóleý mindettemesinen bosatady. Mundaı mehanızmmen kelispegen jaǵdaıda atqarýshylyq is júrgizý jalpyǵa birdeı bekitilgen tártip boıynsha júzege asyrylady.
Azamattardyń bankrottyq rásimine ótinish berý tártibi jeńildetildi. Endi ol úshin kredıtorlar tizimin, merzimi ótken bereshekti retteý jáne óndirip alý rásimderiniń júrgizilgenin rastaıtyn qujattyń kóshirmesin berý talap etilmeıdi. Mundaı derekter kredıttik bıýrodan suratylady. Al kredıtorlar oǵan tıisti málimetti jiberýge tıis.
Alaıaqtyq áreketterge jol bermeý úshin onlaın qaryzdar boıynsha mindetti túrde bıometrııalyq sáıkestendirý engizildi. Buǵan deıin kredıttik bıýroda azamattardyń nesıe alýdan erikti túrde bas tartqany týraly málimet bolǵan jaǵdaıda qaryz berýge tyıym salynǵan edi. Osy Zańda atalǵan tyıymdy buza otyryp berilgen qaryzdar boıynsha bereshekti qarjy ınstıtýttary keshirý talaby engizildi. Sondaı-aq qabyldanǵan Zańǵa sáıkes atalǵan tyıym lombardtar bergen mıkrokredıtterge taralmaıdy.
Alaıaqtardyń yqpalymen rásimdelgenin dáleldeıtin sot aktileri bar bereshekter Zań qoldanysqa engizilgen kúnnen bastap keshiriledi.
Sonymen qatar Zań arnaıy elektrondy saýda alańyn qurý arqyly bankter men mıkroqarjy uıymdarynyń aktıvterin satý mehanızmderin jetildiredi.
Zańnyń mátini baspasózde jarııalanady.
